Fëmijët nuk zgjedhin dot as prindërit dhe as karrierën e prindërve të tyre, por pas të 18-ave, mund të zgjedhin të jenë ose jo, po aq publikë sa nëna apo babai. Qeveritë shqiptare kanë ndërruar shumë ministra e deputetë, por jo të gjithëve ua njohim fëmijët.
Disa kanë zgjedhur të jenë më të rezervuar, të tjerë kanë qenë aq të hapur me familjet e tyre. Por përveç djemve herë-herë problematikë, vitet e fundit, titujt e mediave shqiptare kanë filluar t’i zënë gjithnjë e më shumë vajzat e qeveritarëve shqiptarë.
Ja cilat janë ato që janë përfolur më shumë, një listë e botuar nga revista Anabel.
Argita Berisha (Malltezi)
Vajza e ish-kryeministrit Sali Berisha, pedagoge dhe drejtuese e një studioje ligjore, është akuzuar vazhdimisht nga kundërshtarët politikë të babait të saj se është përfshirë në afera korruptive dhe përflitej se jetonte në luks të shfrenuar. Për këtë arsye, ajo paditi në gjykatë deputetin socialist Taulant Balla për shpifje, gjyq të cilin e humbi.
Dasara Malltezi
E njohur ndryshe si “Supermbesa”, vajza e Argita Berishës dhe anëtarit të PD, Jamarbër Malltezi dhe njëkohësisht mbesa e ish-kryeministrit Berisha. Dasara doli për herë të parë në skenë në vitin 2014, kur publikoi librin e saj të parë, një guidë për maturantët në lidhje me lëndën e letërsisë. Por, ajo padyshim që tërhoqi vëmendjen e të gjithëve kur pas ndeshjes së tensionuar në Beograd, Serbi-Shqipëri, shprehu hapur mospëlqimin e saj si për sjelljen e tifozëve, ashtu edhe për atë të futbollistëve.
Aleksia Peleshi
Fotot provokuese dhe pozimi për kopertinën e një reviste italiane, bënë që Aleksia Peleshi, vajza e zëvendës kryeministrit Niko Peleshi, të pushtonte papritur mediat shqiptare, por edhe të shtojë ndjeshëm ndjekësit në rrjetet sociale.
Besa Kokëdhima
Vajza e ish-deputetit Koço Kokëdhima ka qenë pjesë e skenës muzikore shqiptare shumë kohë më parë se babai i saj të përfshihej në politikë si deputet. Ajo ka nisur të këndojë që në moshë të vogël dhe sot është një nga këngëtaret më të njohura shqiptare. Ndonëse pak kohë më parë u diskutua se edhe ajo do të ndiqte gjurmët e të atit duke u bërë pjesë e politikës, një gjë e tillë nuk ndodhi.
Bora Kokëdhima
Vajza tjetër e deputetit Koço Kokëdhima ka një karrierë si stiliste dhe ka krijuar markën e saj të veshjeve të quajtur “Savage”. Ajo është bërë disa herë pjesë e lajmeve si për diskutimet e shumta lidhur me fustanin e stiluar prej saj për Eneda Tarifën në “Eurosong”, për debatin me stilisten tjetër Enada At’Nikolla lidhur me autorësinë e krijimeve, e po ashtu edhe për fejesën e saj të pak muajve më parë.
Anika Dokle
Vajza e deputetit Namik Dokle, me profesion mjeke gjinekologe, është bërë disa herë pjesë e titujve të medias shqiptare. Vetëm pak muaj më parë ajo u bë pjesë e një debati publik me kryeredaktorin e “Top Channel” Mentor Kikia, i cili e akuzonte atë se kishte marrë rryshfet nga një paciente. Por bujë gjithashtu kanë bërë edhe statuset e saj me natyrë politike, si njëri ku e quan kryeministrin Rama “koka e (kar)vanit”.
Betina Naço
Vajza e ish-ministrit të Drejtësisë Nasip Naço vetëm dy vite më parë u bë pjesë e titujve të mediave pasi disa persona të armatosur, tentuan ta grabisnin. Fatmirësisht Betina shpëtoi e palënduar nga kjo histori, ndërsa një vit më parë, ajo lidhi kurorë në një dasmë që u përcoll edhe nga portalet mediatike.
Eliza Haxhinasto
Ishte krushqia mes dy ministrave ajo që nxiti kuriozitetin e të gjithëve për të njohur më në fund Elizën, vajzën e ish-ministrit të Transporteve, e cila tashmë zyrtarisht, është e fejuara e Franko Naços, djalit të ish-ministrit të drejtësisë Nasip Naço. Eliza është përfolur gjithashtu edhe për festën e saj të madhe dhe luksoze për ditëlindjen e 20-të.
Era Meta
Ndonëse ende e vogël në moshë, vajza e vogël e kryetarit të parlamentit Ilir Meta, ia ka dalë të bëhet personazh. Në një intervistë me Arjan Çanin, politikani u shpreh se Era ishte personi i vetëm që ai ia ngre telefonin, në çdo situatë. Ajo është gjithashtu aktive edhe në rrjetet sociale. Vetëm pak kohë më parë ajo postoi një foto me këngëtaren Bebe Rexha, duke zbuluar kështu, lidhjen familjare prej së ëmës, Monika Kryemadhit me yllin botëror të muzikës POP.
Livia Nikolla
Vajza e ministres së Arsimit Lindita Nikolla, u bë “si padashur” personazh publik për shkak se nëna e saj, e cila e përfshiu në një deklaratë publike që pak kishte të bënte me të bijën. Në ceremoninë e pritjes së lojtarëve të kombëtares shqiptare pas kthimit nga Franca, ku ndodheshin për pjesëmarrjen në Kampionatin Europian, Lindita Nikolla u shpreh ndër të tjera se vajza e saj ndiqte studimet në Francë, me rezultate të shkëlqyera dhe se pas fitores së Shqipërisë, ajo kishte marrë shumë mesazhe urimi nga miq të huaj.
Nada dhe Etida Topi
Vajzat e ish-presidentit të republikës Bamir Topi, krahas bukurisë, u përfolën së shumti në mediat shqiptare për dasmat e tyre me djemtë e dy biznesmenëve të fuqishëm.
Kejda Ajazi
Përsa i përket vajzës së deputetes Majlinda Bregu, ka qenë pikërisht bukuria fizike ajo që e ka bërë të famshme. Kejda është bërë pjesë e renditjeve të portaleve për vajzat më të bukura të parlamentarëve shqiptarë.
Rea Xhillari
Vajza nga martesa e parë e Linda Ramës, u bë personazh në media menjëherë pas martesës së nënës së saj me kryeministrin Edi Rama. Rea Xhillari është vënë në qendër të akuzave të opozitës për shkak të punës që bën në studion famëkeqe belge të arkitekturës, e cila ka realizuar disa projekte në vendin tonë. Vetëm pak javë më parë një sipërmarrje e vajzës së Linda Ramës në biznes, u bë pjesë e lajmeve të ditës.
