Nga Bardha Nergjoni
Të shëtisësh me motorra është tashmë një argëtim që po merr gjithmonë e më shumë vëmendje jo vetëm nga të rinjtë por edhe ata mbi pesëdhjetëvjeçarë, të cilët i bashkohen grupeve apo organizimeve të ndryshme, që udhëtojnë periodikisht brenda dhe jasht vendit. Kujtimi është i apasionuar pas motorrave dhe sidomos pas rrugëve të Shqipërisë që i përshkon bashkë me grupin e tij çdo fundjavë. “Shqiponjat e Rrugëve” gjenden kudo dhe janë të pakta rrugët ku ata nuk kanë kaluar ende. I sheh në çdo cep të Shqipërisë me disa lloj motorrash, frut i pasionit, që ka mbledhur bashkë mbi 18 persona të moshave dhe profesioneve të ndryshme.
Si drejtues i sapozgjedhur i shoqatës, Kujtim Cela udhëheq grupin dhe rrugët nuk kanë të ndalur për ta. Të organizuar i shohim shpesh në rrugë për të marrë atë adrenalinë që i bën të udhëtojnë gjithmonë nën zhurmën e skapamentos dhe erën e asfaltit por edhe nën tymin e rrugëve pa rrugë dhe bukurive natyrore shqiptare. Gjithçka është një aventurë për ta dhe pasi kanë kaluar testin e 10 viteve, janë rimbledhur e kanë zgjedhur drejtuesit e shoqatës për të vazhduar me organizime në të gjithë territorin e Shqipërisë për të zbuluar gjëra të veçanta e për të provuar emocionin e çdo rruge, e çdo vendi, e çdo krahine.
Kujtimi thotë se parë nga motorri Shqipëria është shumë e bukur dhe vlen të shohësh çdo cep të saj. “Shqiponjat e Rrugëve” është formuar 13 vjet më parë dhe është riorganizuar 3 vite të shkuara. “Grupi ynë është formuar në 2004 dhe është rinovuar në 2014.
Jemi “Shqiponjat e rrugëve” sepse ne duam vetëm të ecim në rrugë. Shqiponjat fluturojnë ndërsa ne vetëm duam të udhëtojmë me motorrat tanë në çdo rrugë të mundshme”.
Ndryshe nga shumë grupe të tjera motorrçiklistësh, ata kanë zgjedhur të përshkojnë çdo kilometër shqiptar.
“Ne udhëtojmë vetëm në Shqipëri pasi na pëlqen të njohim vendin tonë mirë. Nuk kemi lënë rrugë të Shqipërisë pa kaluar. Kemi një vend shumë të bukur dhe shumë pak e dinë se sa mrekulli është natyra shqiptare parë mbi një motorr”.
Janë 18 të apasionuar me motorrë të ndryshëm që shkelin gazin dhe nisen në udhëtim çdo fundjavë duke përcaktuar një destinacion që është brenda territorit të kombit shqiptar. “Nuk e kemi problem për rrugët e vështira. Jemi grumbulluar rastësisht. Jemi mbledhur pas shumë viteve dhe kemi bërë rinovimim e shoqatës. Jemi me rregulla dhe me statut dhe me gjithçka duhet. E bëjmë për sport dhe pasion. Shqipëtarët duhet të njohin së pari vendin e tyre e më pas të udhëtojnë. Vendi ynë ka shumë për të zbuluar. Është i vogël por shumë i bukur. Ia vlen me të gjitha mënyrat të vizitohet. Ne kemi zgjedhur motorrat, të tjerët mund të zgjedhin forma të tjera. E rëndësishme është ta shikojmë në çdo cep pasi kështu do të dimë çfarë kemi dhe do ta duam e mbrojmë më shumë nëse jemi të vetëdijshëm për pasuritë e natyrës shqiptare”.
E ndërsa ndezin motorrët, nisin udhëtimin e radhës me zhurmën e dashur të motorrit, 18 “Shqiponjat e Rrugës” përshëndesin në mënyrën e tyre dhe vazhdojnë rrugën në një tjetër destinacion, në një tjetër rrugë nëpër Shqipëri duke u argëtuar, njohur dhe dashuruar vendin e Shqiponjave. /tesheshi.com/
