Instituti i Statistikave të Shqipërisë (INSTAT) ka publikuar të dhënat rreth tregtisë së jashtme për muajin korrik 2015 të Shqipërisë, ku theksohet se partnerët kryesorë tregtarë janë Italia, Turqia, Greqia dhe Gjermania.
Në muajin korrik eksportet e mallrave arritën vlerën 22 miliardë lekë, duke u ulur me 2,6 përqind në krahasim me korrik 2014. Importet e mallrave gjatë këtij muaji arritën vlerën 52 miliardë lekë, duke u rritur me 10,6 përqind në krahasim me korrik 2014.
Sipas të dhënave zyrtare nga INSTAT, shkëmbimet tregtare me vendet e Bashkimit Europian zënë 69,2 përqind të gjithë tregtisë. Në korrik 2015, eksportet drejt vendeve të BE-së zënë 80,0 përqind të eksporteve gjithsej dhe importet nga vendet e BE-së zënë 64,6 përqind të importeve gjithsej.
Partnerët kryesorë tregtarë janë Italia (37,8 përqind), Turqia (6,2 përqind), Greqia (5,9 përqind) dhe Gjermania (5,9 përqind).
Gjatë këtij muaji, vendet me të cilët Shqipëria ka pasur rritje më të madhe të eksporteve, në krahasim me korrik 2014 janë: Gjermania me 54,0 përqind, Italia me 10,4 përqind dhe Kosova me 2,5 përqind. Ndërsa vendet me të cilat eksportet kanë pasur uljen më të madhe janë: Spanja me 26,8 përqind, Malta me 26,5 përqind dhe Greqia me 5,7 përqind.
Në muajin korrik 2015, vendet me të cilët Shqipëria ka pasur rritje më të madhe të importeve, në krahasim me korrik 2014 janë: Gjermania me 22,1 përqind, Turqia me 18,2 përqind dhe Italia me 3,6 përqind. Ndërsa vendet me të cilat importet kanë pasur uljen më të madhe janë: SHBA me 41,2 përqind, Greqia me 13,5 përqind dhe Kina me 3,7 përqind.
