Djali i ri që u gjet i vdekur në Greqi, është identifikuar nga policia lokale.
Viktima është Dorian Mançellari, 32 vjeç, lindur në Pogradec e me banim kohët e fundit në vendin fqinjë Greqi, raporton noa.al.
I ndjeri u gjet i pajetë në Grevena të Greqisë, të shtunën më 14 korrik, buzë rrugës.
Djaloshi ishte në gjendje paraburgimi në Felio, lokalitet i Trikala dhe të enjten më 12 korrik 2018 ishte rikthyer në liri.
Por dy ditë më pas ai u gjet i vdekur në rrethana që mbeten ende të paqarta.
Mësohet se familjarët kanë tërhequr trupin e të riut nga morgu në shtetin grek dhe janë duke e transportuar drejt Institutit të Mjekësisë Ligjore në Tiranë.
Trupi i të riut do t’i nënshtrohet ekspertizës mjeko-ligjore për të përcaktuar shkakun e vdekjes, ndërsa mësohet se edhe në shtetin grek është bërë e njëjta procedurë.
Ekspertët mjeko-ligjorë grekë thanë se i ndjeri ka humbur jetën për shkaqe patologjike duke përjashtuar një krim ndaj tij./a.m.
