Nga Tripp Mickle/ New York Times
Për vite, Mira Murati ka punuar në prapaskenë në OpenAI duke mbikëqyrur zhvillimin dhe shpërndarjen e produkteve revolucionare si ChatGPT dhe DALL-E. Tani, ajo po del në qendër të vëmendjes si shefe e përkohshme ekzekutive. Murati, 34 vjeç u ngrit në pozicionin kryesor në kompaninë e profilit të lartë të premten kur bordi i drejtorëve të OpenAI shkarkoi Sam Altman, bashkëthemeluesin dhe shefin ekzekutiv të kompanisë. Kompania tha se Murati kishte një grup aftësish unike.
Ndonëse ka mbajtur titullin e shefes së teknologjisë që nga viti i kaluar, punonjësit aktualë dhe të mëparshëm shprehen se Murati kishte funksionuar si drejtuese e operacioneve të kompanisë. Ajo u sigurua që inxhinierët e saj të zhvillonin versionet e ChatGPT në orar. Ajo gjithashtu trajtoi marrëdhëniet e kompanisë me Microsoft-in, një investitor dhe partner që ka vendosur teknologjinë e OpenAI-t dhe ka ndihmuar në formimin e politikës së saj të inteligjencës artificiale në Uashington dhe Evropë.
“Ajo ka një aftësi të demonstruar për të mbledhur ekipe me ekspertizë teknike, zgjuarsi tregtare dhe një vlerësim të thellë për rëndësinë e misionit,” shkroi Satya Nadella, shef ekzekutiv i Microsoft.
“Si rezultat, Mira ka ndihmuar në ndërtimin e disa prej teknologjive më emocionuese të AI që kemi parë ndonjëherë.”
E lindur në Shqipëri dhe e shkolluar në Kanada, Murati është një inxhinierja e cila ndërtoi një makinë hibride garash si studente universitare në Kolegjin Dartmouth. Ajo iu bashkua OpenAI në 2018 pas qëndrimeve në Tesla, ku luajti një rol kyç në zhvillimin e makinës Model X dhe Leap Motion, një start-up që zhvilloi një sistem kompjuterik për të gjurmuar lëvizjet e duarve dhe gishtave. Murati tha se puna e saj në Tesla e ekspozoi atë ndaj AI dhe e frymëzoi të kërkonte një punë në atë fushë. OpenAI e punësoi atë si zëvendëspresidente të inteligjencës artificiale të aplikuar dhe partneriteteve. Në atë kohë, kompania ishte një organizatë jofitimprurëse e përkushtuar për të siguruar që inteligjenca e përgjithshme artificiale të përfitonte të gjithë njerëzimin. Më vonë ajo u ristrukturua si një kompani fitimprurëse në mënyrë që të mund të mblidhte shumat e mëdha të parave të nevojshme për të ndërtuar teknologjitë e saj të AI.
“Mendova se në thelb, nëse po ndërton inteligjencën është një njësi e tillë thelbësore në univers, saqë ndikon në gjithçka. Çfarë tjetër ka për të bërë më shumë frymëzues sesa ngritja dhe rritja e inteligjencës kolektive të njerëzimit?”, deklaroi Murati në gusht.
OpenAI mbikëqyrej nga një grup drejtuesish të lartë, ku përfshihej Altman; Greg Brockman, ish-kryetari i saj dhe Wojciech Zaremba, një studiues i AI me origjinë polake, i cili ishte gjithashtu ndër themeluesit e kompanisë. Murati, e cila ishte anëtare e ekipit drejtues, do të zbatonte vendimet e ekipit në të gjithë kompaninë. Ajo mori përgjegjësinë për shpërndarjen e gjeneratorit të imazhit, DALL-E, dhe gjeneratorit të tekstit, ChatGPT, i cili tërhoqi qindra miliona përdorues pas prezantimit të tij vitin e kaluar./
