Në një rrëfim të rrallë dhe plot ndjesi personale, botuesja e njohur Vasilika Tafa, e shtëpisë botuese “Ombra GVG”, zbuloi në emisionin “Rudina” në Tv Klan një episod të panjohur nga adoleshenca e saj, kur guxoi të kritikonte një prej figurave më të mëdha të letërsisë shqipe, Dritëro Agollin.
Kritika e saj në revistën “Nëntori” jo vetëm që shkaktoi jehonë në mesin e të rinjve të kohës, por tërhoqi vëmendjen e vetë Agollit, i cili reagoi me një letër personale plot finesë dhe dashamirësi. “Ju, Vasilika, mund të mos bëheni kurrë poete, por do të mbeteni një minatore e librit”, i shkruante ai.
E sot, ajo vijon të ecë pikërisht mbi këtë rrugë, e përkushtuar, këmbëngulëse dhe me një dashuri të palëkundur për librin.
“Kisha një etje shumë të madhe për të pasur libra në bibliotekë, besoj që kjo gjë erdhi edhe sepse kisha dëshirën që të botoja. Kur kam qenë adoleshentë kam botuar edhe tek ‘Revista Nëntori’. ‘Revista Nëntori’ ishte një revistë shumë e mirë atëherë dhe një kritikë mbaj me të ‘Udhëtoj i menduar’ i Dritëro Agollit, që më bëri të famshme në gjimnaz sepse të gjithë erdhën na zëri i rinisë dhe thoshin “kush ishte ajo kishte sfiduar duke kritikuar Agollin e madh”.
Sigurisht që ai e kishte marrë në një mënyrë shumë sportive, madje dhe më dërgoi edhe një letër personale atëherë. Një letër personale që në fund thotë: ‘Ju Vasilika mund të mos bëheni kurrë poete, por do të mbeteni një minatore e librit.’ Dhe unë jam një minatore e librit”, rrëfeu botuesja.
