Ditën e djeshme gjyqtari Ibrahim Hoxha 57 vjeç dhe djali i tij Ledio Hoxha 25 vjeç u arrestuan për korrupsion për një çështje gjyqësore, pasi morën 6 milionë lekë.
Por bashkë me ta u prangosën edhe një biznesmen e një ish-polic. Ata janë Dritan Jazenxhiu 48 vjeç biznesmen dhe Novruz Gajda 48 vjeç, ish-polic në Drejtorinë e Policisë Qarkut Berat.
Sipas policisë, ata u arrestuan në flagrancë në kohën që djali i gjyqtarit Ibrahim Hoxha, Ledion Hoxha, mori 6 milionë Lekë të vjetra nga ish-polici Novruz Gajda.
Shuma e parave është dërguar nga Dritan Jazenxhiu, palë në procesin civil me gjyqtar në Gjykatën e Rrethit Gjyqësor Tiranë, Ibraim Hoxhën.
Biznesmeni Jazenxhiu 48 vjeç i dha 6 milionë Lekë gjyqtarit të Tiranës Hoxha për një çështje pronësie, vendimi i së cilës do të jepej sot.
Në shtator të vitit 2014, biznesmenit Jazenxhiu i është bërë një atentat, ku 48-vjeçari ka mbetur i plagosur. Ngjarja në atë kohë ndodhi për një konflikt pronësie.
Dritan Jazenxhiu u qëllua pranë dyqanit të tij, ku u gjetën 16 gëzhoja kallashnikovi, të cilat u qëlluan nga një makinë në lëvizje. Nga 16 plumba që u qëlluan, biznesmenin e kapi vetëm 1 plumb dhe mundi të shpëtonte duke mbetur i plagosur lehtë.
Biznesmeni ka pasur një konflikt të hershëm pronësie me familjarët e tij, të cilat kanë qenë të dokumentuara. (express / a.r)
