Liberalizimi i vizave, njohja e pasaportës së Kosovës nga dy shtete mosnjohëse si Spanja dhe Armenia, ishin me 10 arritjeve kryesore që përmendi kryeministri Albin Kurti në mbledhjen e fundit të qeverisë për vitin 2024.
“Së pari liberalizimi i vizave nga BE, Tajlanda, Emiratet e Bashkuara Arabe dhe Tajvani si dhe njohja e pasaportës nga dy shtete mos njohëse Spanja dhe Armenia. Viti 2024 ka qenë viti i pasaportës sonë. Ajo sot renditet më lartë se kurdoherë në indekset ndërkombëtare të pasaportave sivjet është në mesin e top 10 pasaportave të botës që kanë shënuar përmirësimin më të madh në dekadën e fundit. Dy këtë vit filloi regjistrimi dhe inkasimi i energjisë elektrike në 4 komunat tona në veri për herë të parë pas më shumë se 2 dekadave. Gjatë këtij viti gjithashtu ka përfunduar me sukses procesi i konvertimit të patentë shoferëve ilegal në ata të Kosovës, janë regjistruar mbi 6 mijë e 300 konvertime shumica prej tyre nga qytetarët në katër komuna në veri të vendit.”
Kryeministri Kurti tha se viti 2024 ndërtoi themele të forta për siguri energjetike dhe të ndërtimit të kapaciteteve të reja, teksa siç tha ishte mbyllur ankandi i parë diellor në historinë e Republikës.
“E kemi përmbyll me sukses ankandin e parë diellor në histori të Republikës me kapacitete të reja prej 100 MW, të cilin e fitoi konsorciumi nga mërgata jonë në Zvicër ‘Orrlati’ dhe këtë muaj kemi hapur ankandin e dytë për energji të ripërtëritshme, të parin me energji të erës me kapacitet gjithashtu 100 MW. Sivjet gjithashtu ka hyrë në fuqi programi Kompakt i Sfidës së Mijëvjeçarit që përfshinë një investim prej236, 7 milionë dollarësh për energji”, thotë ai.
Si sukses të punës së ekzkekutivit për vitin 2024, kryeministri, Albin Kurti renditi edhe rritjen e pensioneve dhe shtesave për fëmijët ndërsa u shpreh se për herë të parë pas 13 vitesh paga minimale është dyfishuar.
