Kryeministri Albin Kurti, lideri i Lëvizjes Vetëvendosje, rezulton si kandidati më i votuar për deputet në zgjedhjet e 9 shkurtit, sipas rezultateve të bëra publike nga KQZ.
Kurti ka siguruar 259 532 vota, që janë më pak se ato që mori Presidnetja Vjosa Osmani në zgjedhjet e vitit 2021. Me mbi 300 mijë vota, Osmani mbetet personi më i votuar në Kosovë.
Ndërkohë, sa i përket liderëve të partive kryesore dhe kandidatëve për kryeministër, i dyti pas Kurtit pozicionohet Bedri Hamza, kandidati për kryeministër nga Partia Demokratike e Kosovës, me 150 294 vota. Pas tij vjen kreu i LDK, Lumir Abdixhiku, me rreth 109 mijë vota, lideri i PDK, Memli Krasniqi me 85 293 vota, kreu i AAK, Ramush Haradinaj, me mbi 37 mijë vota dhe lideri i Listës Serbe, Zllatan Ellek, me 9 354 vota.
Në rezultatin e publikuar nuk përfshihen votat me kusht, votat e personave me nevoja të veçanta dhe mbi 80 mijë vota nga diaspora.
Lëvizja Vetëvendosje (LVV) – parti në pushtet – ka dalë e para në këto zgjedhje, me 40,80 për qind të votave. Partitë e tjera kanë fituar përqindje më të vogël të votave. Me ligjin e ri për zgjedhjet, votat e kandidatëve për deputetë numërohen veçmas në Qendrat Komunale të Numërimit.
Ky proces ka nisur me vonesë, ndërsa organizatat për monitorim të zgjedhjeve e kanë kritikuar vetë KQZ-në se nuk është përgatitur mjaftueshëm për procesin.
