Kryeministri në detyrë i Republikës së Kosovës, Albin Kurti, i ka shkruar letër presidentit të Kosovës, Hashim Thaçi, ku shprehet se situata aktuale nuk lejon mbajtjen e zgjedhjeve, dhe se kjo është diçka që nuk po kërkojnë të bëhet tani, por sapo të krijohen kushtet pas kalimit të pandemisë.
“Ajo që nuk e kam të qartë, është standardi i dyfishtë që ju dhe partitë politike po tentoni ta impononi në rrugë jokushtetuese, pas këtij mocioni mosbesimi i cili nuk dallon në aspekt formal dhe material nga praktikat e mëhershme. Ndoshta do të mund të na sqaroni këtë?
President, meqenëse prioriteti im i parë si kryeministër, si dhe prioriteti i parë i të gjithë Qeverisë të cilën e udhëheq, është parandalimi i përhapjes së mëtejshme të virusit COVID-19, çdo çështje tjetër partiake apo politike duhet konsideruar e rëndësisë dytësore apo tretësore, duke përfshirë në veçanti ndërhyrjet tuaja të vazhdueshme, të cilat po e pengojnë punën e Qeverisë në mes të një gjendjeje emergjente të shëndetit publik”, shkruhet në letrën e Kurtit.
Ndër të tjera Kurti ka thënë se në takimet me Thaçit nuk ka shkuar si lider i VV-së por si kryeministër.
Deri më tani në Kosovë janë shënuar 8 viktima nga Covid-19 dhe janë infektuar 362 persona.
g.kosovari
