Kryetari i Lëvizjes Vetëvendosje Albin Kurti, ka dalë në një konferencë për mediat dje më 28 dhjetor, pas fitores së VV-së me afër 50 përqind të votave.
Kurti tha se sot ka triumfuar populli i Kosovës. Ai shtoi se institucionet duhet të ngrihen menjëherë, duke nënvizuar se duhet ecur përpara pa vonesa.
“Kjo ishte një fitore madhështore. Më 9 shkurt, fitoi Lëvizja Vetëvendosje dhe partnerët. Sot fitoi populli i Kosovës. Duhet të ecim përpara pa vonesë. Duhet të krijojmë sa më shpejt institucionet dhe të vazhdojmë me punën e mirë dhe të nevojshme. Ne na pret Plani i Rritjes së BE-së. Na presin mbi 1 miliard euro. Ftoj opozitën për marrëveshje për interesin publik, si marrëveshjet ndërkombëtare. Urime për qytetarët, mërgatën dhe të secilit pa dallim”, tha Kurti.
Lëvizja Vetëvendosje arriti të fitojë gati 50 përqind të votave në zgjedhje, duke lënë pas partitë e tjera.
Kurti u pyet edhe për raportet e Lëvizjes Vetëvendosje me Tiranën zyrtare, duke thënë se bashkëpunimi me Shqipërinë ka qenë gjithmonë i shkëlqyer dhe do të jetë i tillë.
