Kryeministri i Kosovës, Albin Kurti, ka pritur në një takim Ndihmës Sekretarin e Përgjithshëm të NATO-s për operacione, Thomas Goffus, ku ka ngritur shqetësimin për rrëmbimin e 3 policëve në veri. Kurti iu drejua zyrtarit të NATO-s se KFOR-i nuk ofroi qartësi për ngjarjen e 14 qershorit 2023 ku u rrëmbyen tre zyrtarë të policisë, përkundër evidencës së ofruar nga institucionet e Kosovës. Kryeministri tha se Qeveria e Kosovës është e përkushtuar për bashkëpunim dhe bashkërendim të plotë me misionin e NATO-s, KFOR-in.
Gjatë takimit, Kurti e ka falenderuar Thomas Goffus për kontributin dhe rolin e domosdoshëm të NATO-s për çlirimin dhe sigurinë e Kosovës.
“Kosova me Forcën e saj të Sigurisë, të trajnuar e orientuar nga perëndimi. duhet të bëhet anëtare e Partneritetit për Paqe të NATO-s sa më shpejt që është e mundur”, tha kryeministri.
Siç njoftohet, ai e informoi Goffus për kornizën kohore të ngjarjeve nga 5 nëntori i 2022, kur dhanë dorëheqje të organizuar katër kryetarët në komunat në veri të Kosovës, dhe tha se është i angazhuar për de-eskalim dhe normalizim.
“Sundimi i ligjit, mungesa e protestave të dhunshme e aktiviteteve kriminale dhe zgjedhjet e hershme janë rruga përpara drejt de-eskalimit dhe për këtë qeveria është maksimalisht e angazhuar. Megjithatë, masat negative të Bashkimit Evropian ndaj Kosovës si vendi më demokratik në Ballkanin Perëndimor, që ka sanksionuar agresionin rus në Ukrainë dhe që është në harmoni me politikën e jashtme të BE-së, kanë krijuar asimetri në dialog”, theksoi Kurti./m.j
