Nga Av.Edmond Petraj
Por nga mënyra se si shpifja, dizinformimi dhe urrejtja politike po shiten si “fakte”.
Jam i shokuar se si përflitet se një procedim penal qenka regjistruar në shtetin grek, kur nuk ekziston asnjë regjistrim zyrtar.
Jam i shokuar se si flitet për vendime penale imagjinare, për arrestime që nuk kanë ndodhur kurrë, për sekuestrime pasaportash, gjurmë gishtash, dënime e dëbime që nuk ekzistojnë në asnjë akt zyrtar.
Jam i shokuar se si pretendohet se janë asgjësuar prova të një dosjeje penale, ndërkohë që nuk provohet ekzistenca e vetë dosjes.
Jam i shokuar se si përflitet arrestimi i një gjyqtareje dhe bashkëshortit të saj, pa asnjë vendim, pa asnjë njoftim zyrtar, pa asnjë dokument.
Dhe mbi të gjitha, jam i shokuar se si këto gënjeshtra përsëriten në media, duke u kthyer në “të vërteta” vetëm sepse thuhen shumë herë.
E vërteta është një dhe vetëm një:
Gjyqtarja Irena Gjoka nuk ka asnjë procedim penal të regjistruar në Greqi,
nuk ka asnjë vendim penal ndaj saj apo familjarëve të saj.
Çdo gjë tjetër është thashethem i qëllimshëm.
Kjo nuk është më kritikë ndaj një vendimi gjyqësor.
Kjo është goditje politike dhe etnike, e koordinuar, me qendra të njohura në Janinë, Tiranë dhe Himarë, ku për vite me radhë janë kultivuar narrativa antishqiptare dhe janë rekrutuar individë për të prodhuar kaos dhe përçarje.
Sepse ajo gjykoi dhe dënoi Belerin.
Sepse u tregua se ligji shqiptar nuk përkulet përballë presionit etnik dhe politik.
Sepse ishte më e lehtë të shpallej “kokë turku” sesa të pranohej se drejtësia funksionoi.
Ajo që po ndodh nuk ka lidhje as me reformën në drejtësi, as me integritetin profesional të një gjyqtareje.
Ka lidhje me frikën e disa klaneve antishqiptare, që reforma në drejtësi – me gjithë problemet e saj – po prek interesa reale.
Reforma në drejtësi nuk është perfekte.
Asnjë reformë e re nuk është.
Por ajo nuk rrëzohet duke linçuar gjyqtarë të ndershëm mbi bazë shpifjesh.
Irena Gjoka nuk është simbol i dështimit, por shënjestër e një sulmi.
Dhe sulmi ndaj saj është sulm ndaj shtetit të së drejtës, ndaj integrimit europian të Shqipërisë dhe ndaj dinjitetit institucional shqiptar.
Mjaft me “burime anonime” që prodhojnë helm.
Gjyqtarët gjykohen me ligj, jo me thashetheme.
Vendimet kundërshtohen me mjete ligjore, jo me shpifje.
Irena Gjoka dhe familja e saj duhet të mbrohen nga ky endemizëm kolektiv i urrejtjes, sepse sot është ajo nesër mund të jetë çdo gjyqtar që guxon të zbatojë ligjin.
Gjyqtarja Irena Gjoka nuk ka kryer asnjë shkelje ligjore.
Çdo pretendim që qarkullon në media për arrestime, sekuestrime ose vendime penale ndaj saj është i rremë, dhe synon të sulmojë pavarësinë e gjyqtarëve dhe imazhin e reformës në drejtësi.
Sulmet e tilla janë në kundërshtim të hapur me Kushtetutën, ligjin për gjyqtarët, Kodin e Procedurës Penale dhe rregulloret e KEDNJ.
Irena Gjoka dhe familja e saj duhet të mbrohen nga fushata e dizinformimit dhe linçimit publik. Mbështetja jonë nuk është thjesht morale, por e mbështetur fuqimisht nga ligji.
Drejtësia nuk mbrohet duke heshtur.
Drejtësia mbrohet duke thënë të vërtetën.
Foto… Një nga dokumentet e dosjes ku e vërteta është në dritë të diellit
