Edhe pse një ditë më parë u raportua se PD-PS kanë një dakordësi për t’i dhënë zgjidhje garës për kreun e RTSH, zërat nga opozita që anatemojnë garën nuk kanë munguar. Përmes një reagimi publik, deputetja Ina Zhupa ka hedhur dyshime mbi procedurat dhe skualifikimet e konkurrentëve. Demokratja merr si rast kandidaturën e një gazetareje, siç është zonja Eni Vasili, duke dhënë ndër të tjera edhe solidaritetin e saj si grua.
Por akuzat e Zhupës nxjerrin në pah një anë të zymtë të politikës, kryesisht nga kampi opozitar, i cila i përdor kauzat e ndryshme duke përdorur standarde të dyfishta. Për shembull, në rastin e bashkëshortes së Kryeministrit Linda Rama, Zhupa dhe koleget e saj nxituan të firmosin një shkresë drejtuar donatorëve në Shqipëri, ku edhe hidhnin akuza ndaj zonjës Rama dhe kërkonin ndërprerjen e projekteve ku ajo ishte kontributore.
Pavarësisht se organizatat ombrellë të OKB e nxorën blof të gjithë përpjekjen e PD, mungesa e një ‘mea culpa’ nga ana e opozitës është po aq domethënëse sepse nxjerr në pah qëllimin e vërtetë të sulmeve. E thënë ndryshe, zbulon ‘solidaritetin me kushte’ të zonjave në PD, ndaj episodeve ku atakohen gratë në përgjithësi.
Kjo nuk është hera e parë që politika del zbuluar në standardet që përdor. Dhe kjo pasqyre e një solidariteti part-time ka të bëjë jo vetëm me çeshtjet e të drejtave të grave, por për shumë tema të tjera, ku i njëjti politikan firmos edhe kështu, edhe ashtu. I përplasen firmat rrugës me një fjalë.
