Presidenti Nishani nisi vitin 2017 me një vendim shumë të debatueshëm, dekorimin e gazetës Rilindja Demokratike, një organ i PD me titullin më të lartë të “Kalorësit të Urdhërit të Skëndërbeut”.
Sipas përcaktimeve ligjore, ky titull “u jepet shtetasve shqiptarë dhe të huaj për kontribute të qenësishme ose akte të veçanta heroike në mbrojtjen, forcimin e përparimin e Republikës së Shqipërisë. Propozuesi mund të jetë Presidenti i Republikës, Kryeministri, Kryetari i Kuvendit”.
Vendimi i ardhur me rastin e 26-vjetorit të themelimit të RD, për “aktet e saj heroike” është i paprecedent, jo vetëm pasi këto akte është e pamundur të provohen, por edhe sepse Presidenti shpërblen një gazetë që ka në statutin e saj dhe në objektivat e saj, natyrshëm qënien e njëanshme në dobi të forcës politike që ajo përfaqëson.
Megjithatë, ky vendim i debatueshëm është në vazhdën e një tradite të “inflacionit” të medaljeve dhe titujve të krijuar nga Presidenti i Republikës, i cili gjatë vitit 2016 ka akorduar në total 221 medalje, për një mesatare prej një medalje në ditë pune.
Një bilanc mbi shfaqjet publike të Presidentit Nishani vërteton se kreu i Republikës, politikë “ndjek të njëjtën qokash”. 53 veprimtari publike të Presidentit (sipas faqes së vetë Presidencës), janë të ndara në 11 mesazhe ngushëllimi për personalitete që ndërruan jetë gjatë vitit, 8 urime për festa kombëtare të huaja dhe zgjedhje liderësh të huaj, 7 urime për festa fetare, 8 intervista, 2 konferenca për shtyp dhe vetëm 3 shkëmbime diplomatike./ Lexo.al/a.m.
