Lorenc Vangjeli
Varet nga këndvështrimi. Varet nga pozicioni. Sa kohë kërkon nga drejtësia dhe ajo nuk e jep, i gjithë sistemi quhet i korruptuar.
Sa kohë të duket se është pala tjetër që kërkon të verë drejtësinë nën “hyqëm”, apo kur kërkohet reformë për të, apo dhe kur kërkohet largimi i gjyqtarëve emblematikë e problematikë, atëherë brohoritet që sistemi është i pavarur. Se politika nuk duhet të ndërhyjë, se sistemi është vetërregullues e të tjera parime që janë tmerrësisht të saktë, si aksioma manualesh. Por në SHBA, për shembull. Ose në Britaninë e Madhe. Në Shqipëri ngjan se është ndryshe.
Eshtë interesant të shihet se çfarë thotë e bën Presidenti Nishani në dy kohë përballë sistemit të drejtësisë. Kur ishte partia e tij në pushtet dhe tani kur partia që e bëri president është në opozitë. Ngjan se janë dy personazhe të ndryshëm. I pari është i ndryshëm nga i dyti. Dhe janë të ndryshëm jo vetëm në çfarë kanë thënë, por dhe më shumë se kaq. I pari kishte mustaqe. I dyti jo më. Sepse e majta sa erdhi në pushtet, nën kujdesin e veçantë të kryeministrit Rama, a thua se kjo ishte emergjencë kombëtare, u morr me portretin e Presidentit.
Zoti Nishani bëri mirë dje që ju la mustaqet në dorë, por bën keq sot që i shtohet trashëgimisë së gabuar presidenciale që lidhet me drejtësinë.
