“Harta është pothuaj krejt mavi”. Fjalët e Jozefina Topallit nuk lenë vend për asnjë mëdyshje. Ish-kryetarja e Kuvendit nuk e sheh 21 qershorin as si fitore dhe as si hap të madh përpara, duke perifrazuar fjalët e kryetari Basha pas votimit. Madje ajo thotë se opozita ka humbur vota. Shumë vota. Sipas saj, e djathta shqiptare ndodhet aktualisht në sinoret elektorale të vitit 1991, atëhere kur, shprehet ajo, në Shqipëri ishte thuajse vetëm Shkodra.
Topalli nuk njihet si dashamirëse e Lulzim Bashës. E ka pasur halë në sy politikanin e ri, qëkurse ai nisi rrugën e ngjitjes në Partinë Demokratike, e më pas, kur u afirmua gradualisht si kryetari i ardhshëm i PD. Por mëria që Jozefina Topalli ka ndaj Bashës, nuk qëndron si e tillë, kur ballafaqohet me shifrat që ajo ofron, për dokumentuar se PD-ja e Bashës nuk e fitoi garën me kundërshtarët politikë. Në këtë rast ka vend të thuhet se mëria personale e zonjës së fortë nga Shkodra përkon egzaktësisht me realitetin që lanë pas zgjedhjet lokale të 21 qershorit. Dhe në fund, thirrja e saj që “PD të shikojë më shumë nga vetja”, duket si një apel i qartë për më shumë analizë dhe reflektim brenda një force politike, që vazhdon ta përkundë veten në realitetin paralel që përpiqet të ndërtojë kryetari i saj.
