Kur fliste Dritëroi të gjithë dëgjonin. Askush nuk guxonte ta kritikonte kur fliste ai edhe pse ishte kundër linjës politike… Iku nga kjo jetë pa asnjë cen, pa përfituar në mënyrë të padrejtë as një fije floku.
Ky ishte mesazhi i kreut të grupit parlamentar të PS-së Gramoz Ruçi, në hamezhet e zhvilluara për shkrimtarin e madh Dritëro Agolli. Sipas Ruçit, Agolli bëri atë që shumëkush nuk e bëri…me mendjen dhe fjalët e tij, shkurtoi ditët e sistemit komunist.
“Kur fliste Dritëroi të gjithë dëgjonin. Askush nuk guxonte ta kritikonte kur fliste ai edhe pse ishte kundër linjës politike. Mesazhi që na lë: Mendja e Dritëroit shkurtoi ditët e sistemit që lamë pas. Më kujtohet viti 90, në atë periudhë ku konkurronin 2 vendime ndaj studentëve, të përdorej forca apo mendja.
Sigurisht që Dritëroi ishte me të dytën, dhe ishte flamurtar i pranimit të pluralizmit politik dhe ndaj studentëve të zbatohej vetëm dialogu. Shumë thonë që demokracinë e prura unë, por ka qenë një paradoks në 90 që si rezultat i këtyre njerëzve të mençur që mbanin qëndrime, pluralizmi politik në Shqipëri u fut pa shumë vështirësi si në vendet e tjera të Lindjes. Në këtë sallë ku jemi sot, ishte mbledhur Kongresi i Partisë së Punës.
Shumë nga ne i themi vetes themelues të Partisë, por në këto ditë të gjithë e kemi freskuar memorien me një insert që media ka dhënë për Dritëroin. Foli ai në sallë, dhe e fërshëllyen, por Dritëroi i qëndroi stoik mendimeve të tij. Sipas Dritëroit janë intelektualët ata që udhëheqin turmat, që në atë kohë duartrokisnin udhëheqësin. Ata nuk e dinin që Dritëroi kishte një program ku nuk bëhej fjalë për Marksizëm-Leninizëm, por për pluralizëm politik. Në këto 25 vite është vështirë të gjesh një të dytë si Dritëroi që respektohet nga të gjithë. Vështirë të gjesh një politikan që nuk nderoi dhe respektoi këtë ditët mortore të Dritëroit. Kur u vendos pluralizmi të gjithë thanë ne e sollëm demokracinë, por një fjali e Dritëroit i uli në gjunjë: Të gjitha partitë shqiptare kanë dalë nga mitra e përgjakur e PPSH-së. Kurrë nuk e braktisi krijimtarinë për sytë e bukur të dashnores politikë. Asnjëherë nuk u tundua. Iku nga kjo jetë pa asnjë cen, pa përfituar në mënyrë të padrejtë as një fije floku”-tha Ruçi./a.k
