Në vazhdën e publikimit të videove nga arkivi, “Associated Press” sjell pamje nga lirimi i përkohshëm i Fatos Nanos nga burgu për të marrë pjesë në varrimin e së ëmës.
Nën masa të rrepta sigurie, ai u transportua nga burgu i Bënçës drejt kryeqytetit, pas lejes së marrë nga presidenti i atëhershëm dhe rivali i tij politik, Sali Berisha.
Gjatë atyre pak orëve në liri ai u takua me familjarët, një pjesë të të cilëve nuk i kishte parë qyshkur u burgos në vitin 1993.
“Dua të falënderoj autoritetet që më lejuan të marr pjesë në këtë funeral së bashku me familjen e miqtë, për t’i dhënë lamtumirën e fundit nënës sime. I falënderoj sepse treguan ç’do të thotë armëpushim. Kur vdekja është në mes, edhe armiqtë i ulin armët. Por do të doja që këtë ta bënin edhe përballë të gjallëve”, shprehej Nano.
Ai vuajti dënimin nga viti 1993 deri në 1997-ën, kur shpërthyen trazirat në vend.
