Elon Musk i dërgoi email Jeffrey Epstein në fund të vitit 2013 për të koordinuar një udhëtim në ishullin e Karaibeve të Epstein, siç tregojnë dokumentet e publikuara nga Departamenti i Drejtësisë sot.
Musk më parë kishte pohuar se kishte refuzuar përpjekjet e Epstein për ta bindur atë të vizitonte një nga dy ishujt që zotëronte Epstein, Great St. James dhe Little St. James, në Virgin Islans të SHBA-së. Little St. James ishte një epiqendër e abuzimit të vajzave dhe grave të reja nga Epstein për dekada të tëra.
Më 13 dhjetor 2013, Musk i dërgoi email Epstein: “Do të jem në zonën e Ishujve të Virgjër Britanikë/St Bart gjatë festave. A ka një kohë të mirë për ta vizituar?”
Epstein u përgjigj dy ditë më vonë dhe tha se fillimi i vitit të ri do të ishte i mirë, duke shtuar: “Gjithmonë ka hapësirë për ty”. Ditën e Krishtlindjeve, Epstein tha në një email tjetër: “2 ose 3 do të ishin perfekte. Do të vij të të marr.”
Musk u përgjigj fillimisht se do t’i duhej të fluturonte përsëri në Los Angeles natën e 2 janarit, përpara se të thoshte se mund ta shtynte largimin e tij një ditë më vonë.
“Kur duhet të shkojmë në ishullin tuaj më 2?”, e pyeti Musk Epsteinin.
Përfaqësuesit e Musk nuk iu përgjigjën menjëherë një kërkese për koment në lidhje me emailet e reja.
Nuk është e qartë nga emailet nëse Musk e vizitoi përfundimisht ishullin. Por emailet tregojnë një nivel komunikimi midis dyshes që nuk ishte zbuluar më parë.
Gjatë grindjes së tyre vitin e kaluar, Musk sugjeroi që Presidenti Donald Trump kishte ngadalësuar publikimin e dosjeve të Epstein sepse emri i presidentit ishte në to. Kjo ishte pjesë e prishjes së marrëdhënies midis presidentit dhe një burri që kishte qenë një nga këshilltarët e tij më të ngushtë.
Në shtator, pasi emri i Musk u përfshi në një grup tjetër dosjesh, ai kërkoi të distancohej nga shkelësi i dënuar seksual. Ai tha në një postim në X në atë kohë se “Epstein u përpoq të më bënte të shkoja në ishullin e tij dhe unë REFUZOVA.”
