Bisedat telefonike, kamerat e sigurisë dhe emri i Jurgen Kurtit në telefonin e njërit prej të arrestuarve për vrasjen e tij, janë provat më të forta që ka në dorë grupi hetimor kundër 4 personave të dyshuar për atentatin e 18 marsit.
Tre prej të dyshuarve si organizatorë të krimit janë vënë në pranga, ndërsa personi që, sipas Policisë, ka shkrepur armën, vijon të jetë në kërkim. Burime nga grupi hetimor thanë se i dyshuari kryesor, që ka dhe rolin e ekzekutorit, është 38-vjeçari Klodjan Bane nga Patosi.
Sipas të dhënave, ka qenë një pakujdesi e tij, që ka bërë të mundur zbulimin e grupit, megjithëse “koka”, ai që ka porositur krimin, ende nuk dihet. Deri tani ka të dhëna se për eliminimin e 26- vjeçarit Jurgen Kurti janë paguar 30 mijë euro.
Shifër kjo e dalë nga përgjimet telefonike mes të arrestuarve dhe personit në kërkim. Ata kanë folur me njëri-tjetrin për para, duke pyetur nëse është folur për lekët dhe se kur do i marrin. Por se nga kush, ende nuk është zbuluar.
BISEDAT TELEFONIKE
Burime nga grupi hetimor thanë se ka prova konkrete për tre personat e arrestuar, të cilët dyshohet të jenë përfshirë në vrasjen e 26-vjeçarit Jurgen Kurti dhe përmes tyre është zbardhur edhe mekanizmi i ngjarjes. Mësohet se ata kanë vëzhguar prej afro 2 javësh Kurtin, duke mësuar të gjitha lëvizjet e tij.
Por, asnjëri prej tyre nuk ka qëlluar me armë në drejtim të tij. Ata janë identifikuar përmes përgjimeve të kryera nga ana e grupit hetimor, ku në bisedat mes tyre kanë përmendur edhe një shumë prej 30 mijë eurosh, që dyshohet të jetë pagesa për realizimin e vrasjes. Megjithatë, kjo ende nuk është saktësuar. “Ke folur për ato lekët?”. “Kur do i marrim ato lekët?” Këto janë disa nga bisedat e zbardhura mes tyre, menjëherë pas vrasjes.
KAMERAT DHE DESHMITARET
Nga verifikimi i më shumë se 50 kamerave të sigurisë, që nga rruga “Zef Jubani”, ku ndodhi vrasja në Tiranë, përgjatë unazës, te “Pallati me Shigjeta” e deri te Liqeni i thatë, Policia ka zbardhur rolet e të arrestuarve dhe personit në kërkim. Makina me të cilën kanë lëvizur atentatorët ka qenë tip “Mercedes Benz” ngjyrë gri dhe është në pronësi të të kërkuarit Klodjan Bane.
Makina rezulton me dokumentacion të rregullt, e regjistruar në Fier, por në momentin kur është kryer vrasja, makinës i ishin vendosur targa false. Por ka qenë pikërisht vendosja e këtyre targave, pak para vrasjes, që ka zbuluar autorët. Ky moment është fiksuar nga një kamera sigurie dhe, sipas të dhënave, dyshohet se ka qenë vetë atentatori që ka bërë ndërrimin.
Por sikur të mos mjaftonte vetëm ky gabim, në momentin kur ka shkrepur armën ai ka qenë i pamaskuar dhe disa dëshmitarë kanë arritur t’i shohin fytyrën. Madje, në një moment ai edhe u është hakërryer atyre, në formë presioni se përse po e shihnin. Njëri nga të arrestuarit, Elsi Levendi, ka qenë personi që ka ndjekur në këmbë Jurgen Kurtin deri pranë banesës, duke sinjalizuar më pas 2 personat e tjerë që ishin në makinë, atentatorin dhe bashkëpunëtorin. Personi i katërt ka pritur në këmbë në hyrje të rrugicës për të parë lëvizjet në zonë.
VRASJA DHE LARGIMI NGA VENDNGJARJA
Në momentin që Jurgen Kurti ka qenë duke lëvizur në trotuarin poshtë pallatit ku banon dhe ishte drejtuar për te hyrja, në drejtim të tij është qëlluar të paktën 20 herë me një armë automatike, duke e lënë të vdekur në vend. Pas vrasjes, autorët janë larguar me dy automjete të ndryshme.
I dyshuari si autor i vrasjes bashkë me njërin nga bashkëpunëtorët janë larguar me automjetin tip “Benz”, duke marrë drejtimin për nga “Pallati me Shigjeta”. Ndërsa shtetasi Elsi Levendi bashkë me shokun e tij që vëzhgonte rrugën kanë hipur në një taksi në rrugën kryesore dhe kanë lëvizur në drejtim të Liqenit. Të katërt personat e dyshuar si të përfshirë në këtë ngjarje janë takuar bashkë në afërsi të Liqenit të Thatë./panorama
/a.meta
