Erdogan ka ngritur një furtunë sot në Tiranë, duke hapur një temë të cilën shteti shqiptar nuk e kishte konsideruar më parë si diçka që vendos për marrëdhëniet mes dy shteteve.
Pasi presidenti turk “hapi thesin” e investimeve, u ka kërkuar autoriteteve vendase që të jenë më bashkëpunues sa i përket interesave turke që lidhen me sigurinë e shtetit të tij.
Erdogan foli indirekt për lëvizjen gyleniste në Shqipëri. Ish-miku i tij Fetullah Gylen që predikon islamin e moderuar, tashmë në ekzil, drejton kolegjet turke në Shqipëri si dhe të paktën një universitet.
Por çfarë janë gylenistët dhe a është ky një debat i ri për Shqipërinë?
Në librin e tij “Hëna e Shqipërisë” deputeti i Partisë Socialiste, Ben Blushi shprehet se një pjesë e mirë e policisë shqiptare është gyleniste. “JAVA News” sjell për lexuesit pjesën kur Blushi shkruan se të paktën 10 policë të edukuar në Turqi ndjekin rrymën e Fetullah Gylen dhe se ata janë praktikantë.
“Një pjesë e mirë e policisë shqiptare, e edukuar ose e trajnuar në Turqi, edhe sot është gyleniste, dhe ka burime të besueshme, të cilat pretendojnë se mbi dhjetë përqind e policëve shqiptarë janë gylenxhi”, shkruan Blushi.
Autoritetet e policisë së asaj kohe, dhe më konkretisht ish-drejtori Hysni Burgaj, u kontaktua nga gazeta Shqip. Burgaj nuk e pohoi, por as nuk e mohoi një të dhënë të tillë.
