Ka dalë sot në media një listë portalesh, e publikuar nga AKEP (Autoriteti i komunimimeve elektronike e Postare), në të cilën ky institucion i bën thirrje këtyre të fundit që të paisen me numrin e NIPT (numri i identifikimit të personit të tatueshëm) brenda 72 orëve. Nëse kjo nuk ndodh, vijonte njoftimi, portalet e papaisura me NIPT do të mbylleshin.
Që një organizëm shtetëror të kujtohet se bizneset private të cilat mbikqyr, duhet të përmbushin një standart të caktuar, kjo është diçka pozitive dhe për t’u përshëndetur. Javanews.al, si pjesë e komunitetit të gjerë të mediave online, e ka pasur gjithmonë parasysh të qenit korrekt me ligjet e normat që rregullojnë sektorin ku vepron.
Është për të ardhur keq ndërkohë, që vetë AKEP, me pakujdesinë për të verifikuar listat që prodhon, është bërë pjesë e një keqkuptimi, ose më saktë e një lloj fletërrufeje mediatike, që ka pasur si target portalet që ishin përfshirë në radarin e AKEP.
Nuk na vjen aspak keq që na ka dalë emri gabimisht në një listë ku nuk duhej të ishim fare, për shkak se, si media, jemi të paisur me NIPT prej shumë vitesh. Na vjen keq sesi një institucion që paguan specialistë dhe që merr përsipër të vendosë rregull, bëhet pjesë e shtimit të kaosit e paqartësisë në raport me sektorin që duhet të mbikqyrë. Do të mjaftonte një kontroll banal online në QKR, në mënyrë që AKEP të kishte ide të saktë mbi përdorimin e NIPT-it nga portalet e listuara. Kaq pak duhej, për të shmangur një “gjyq popullor” nga ata të rëndomtët, që na u bë sot publikisht për një faj që s’e kishim.
Javanews.al
