Kupa e Amerikës ka humbur një nga favoritët e saj kryesorë. Brazili i Karlos Dungës nuk ka mundur të kalojë grupin, pas humbjes shokuese ndaj Perusë, me rezultatin 0-1, por ka pasur shumë polemika, sepse goli i Raul Ruidiaz duket se është shënuar me dorë.
Brazili ka protestuar shumë dhe gjyqtari, pasi disa minutash këshillim me asistentët e tij, e ka quajtur të rregullt golin.
Mjaftonte edhe barazimi për të kaluar më tej, por brazilianët kanë pësuar një gol në pjesën e dytë dhe nuk kanë mundur të barazojnë, ndërkohë që Ekuadori ka fituar thellë me Haitin dhe është kualifikuar. Kjo ishte ndeshja e dytë në grup, që Brazili nuk arriti të shënonte gol, pasi në debutim barazoi 0-0 me Ekuadorin. Një disfatë e madhe për kombëtaren braziliane dhe menjëherë kanë shpërthyer kritikat për trajnerin Karlos Dunga, por edhe për futbollistët.
Kombëtarja e “sambës” humbi disa nga yjet e saj para nisjes së turneut, por ky nuk është justifikim për një dështim kaq të madh, shkruan dita.
Ndoshta fitimi i Kupës së Amerikës nuk ishte i sigurt, por eliminimi që në grup as që mund të imagjinohej në Brazil dhe jo vetëm./ a.k
