Policia e Tiranës ka nisur procedim penal në gjendje të lirë dhe ka referuar materialet në prokurori për kreun e PD-së së Lushnjës, Myslim Murrizi, me akuzën kanosje dhe mosbindje ndaj urdhrit të policisë.
Procedimi ndaj tij kishte nisur para se Murrizi të publikonte në rrjetin social videon e debatit që pati me efektivin e Qarkullimit, pasi nuk kishte vendosur rripin e sigurimit. Përveç videos së publikuar nga vetë ai, policia ka si provë videon e regjistruar nga kamera e trupit që ka të vendosur polici që ishte në shërbim. Në bazë të saj kanë nisur edhe veprimet procedurale.
Më pas, nëpërmjet avokatit të tij, Policia e Tiranës i ka bërë thirrje Myslim Murrizit që të paraqitet për të dhënë deklarime në lidhje me akuzat e ngritura ndaj tij dhe të sqarojë rrethanat e ngjarjes. Sipas burimeve nga Policia e Tiranës dhe në bazë të filmimit të kryera nga vetë ish-deputeti, ky i fundit kanos, fyen dhe ofendon punonjësin e Policisë Rrugore të Tiranës. Në videon me filmime të kamerës së trupit të policit, që është dorëzuar si provë në prokurori, është filmuar çdo bisedë e bërë nga punonjësi i policisë dhe shtetasi Myslim Murrizi, tashmë i proceduar për dy vepra penale, shkruan “Panorama”.
Nga ana tjetër, nisur nga lajmet e publikuara në disa portale, për shpalljen në kërkim të Myslim Murrizit, ai ka reaguar duke thënë se nuk është Eskobari i Ballkanit që policia nuk e gjen dot.
“Duhet të dini që Myslim Murrizi ka qenë nga ora 08:30 e ditës së djeshme (të enjten), gjithë ditën dhe gjithë natën në banesën e tij. Asnjë polic nuk më ka trokitur te dera. Ju bëj me dije se kam komunikuar në telefon me një oficer policie të Komisariatit Nr.1 rreth orës 19:30 dhe mund ta kontaktoni atë se çfarë kam biseduar. Myslim Murrizi nuk është Eskobari i Ballkanit që nuk e ‘gjen’ dot policia. Myslim Murrizi nuk e jeh vrapin si ‘sport’, përkundrazi tjetër sport ka treguar se ka qejf nga 8 dhjetori i vitit 1990”, shprehet Murrizi.
