Nga Adriatik Doçi
Sipas të gjitha sondazheve serioze, të provuara dhe të konfirmuara nga rezultatet zgjedhore, 65-75 % të shqiptarëve nuk i besojnë opozitës, e cila prej 12 vitesh ka humbur në çdo palë zgjedhje, duke përsëritur pak a shumë të njëjtat alibi pas çdo disfate elektorale, avaz të cilit me shumë gjasa nuk do t’i ndahet as pas 11 majit.
Pavarësisht kësaj përvoje dhe këtyre mesazheve, opozita jo vetëm vijon të njëjtën strategji Babaleje, të njëjtin raport problematik me të vërtetën dhe logjikë ‘barëngrënëse’, por ka marrë konturet e një thesi rrenash, dezinformimi dhe karagjozllëqesh të larmishme, duke e bërë aq aktuale shprehjen e famshme që i atribuohet Albert Einstein: ‘Çmenduria: të bësh të njëjtën gjë përsëri e përsëri dhe të presësh rezultate të ndryshme’, por edhe moton e Ushtarit të Mirë Shvejk: ‘Ç’më duhet mua se çfarë them unë’.
Paraditen e sotme, ish- deputeti i PD Belind Këlliçi, doli në një konferencë për mediat, ku denoncoi një komplot në drejtësi, duke iu referuar serisë së radhës të një telenovele intriguese në drejtësi, me regjizore gjyqtaren e Tiranës Arnisa Këlliçi, e njohur si ‘Griselda e Kavajës’, e pandehur pasi sipas Prokurorisë i shkruante letra kërcënuese vetes së saj. Madje Këlliçi paralajmëroi se do t’a kallëzonte komplotin në SPAK, edhe pse një ditë më parë kishte protestuar para SPAK-ut, duke e denoncuar si të kapur nga mazhoranca.
Në gjendje të rënduar emocionale, ‘Griselda’ e Gjykatës së Tiranës, e pezulluar nga detyra që në shkurt 2024, krahas inskenimeve të kërcënimeve me letra që i shkruan vetë, është kthyer në një studio montazhi komunikimesh të sajuara mes saj dhe magjistratëve të ndryshëm, mes personave që ajo mendon se i kanë bërë keq, individëve brenda dhe jashtë sistemit të drejtësisë.
‘Komploti’ i denoncuar sot para mediave nga ‘butaku’ i PD i referohet disa komunikimeve të sajuara nga gjyqtarja Arnisa Këlliçi mes ish kryetares së KLGJ Naureda Llagami dhe kryetares së Komisionit të Ligjeve Klotilda Bushka.
Arnisa Këlliçi, kreu i ILD Artur Metani, Llagami dhe Bushka kanë qenë pjesë e një rrethi shoqëror. Në takime të përbashkëta, ku gjyqtarja Këlliçi ka bërë fotografi fshehurazi, nuk dihet se çfarë bisedash janë bërë.
Intriga me inskeimin e kërcënimit me letrën, arrestimeve imagjinare nga SPAK, bllokimit të arrestimeve, përgjimeve dhe procedimeve të trilluara, doli jashtë kontrollit dhe përfundoi me ekzspozimin dhe ndëshkimin e gjyqtares Këlliçi, e cila është bashkëshorte e kushëririt të Belo Këlliçit. Kjo e fundit, me sa duket, ndihej e tradhtuar nga miqtë e saj, dhe si hakmarrje sajoi komunikime ‘kompromentuese’ mes tyre, bazuar në rrethana, biseda dhe elemente gjysmë të vërteta.
Ashtu si për letrën kërcënuese, mediat ranë në kurth dhe i pandehën si të vërteta disa komunikime të fabrikuara nga gjyqtarja me kolegë të saj, të cilët herë i paraqiste si kërcënues, herë si matrapazë, herë si admirues të saj, herë si bandillë dhe herë si të trandur nga dosje të shpikura prej saj. Por, me ekspozimin e fakteve të inskenimit, mediat nisën të distancoheshin nga telenovela, duke marrë me rezerva çdo gjë që servirej nga regjizorja që trazoi drejtësinë, e cila detyroi edhe disa gjyqtarë të arratiseshin nga një operacion imagjinar i trilluar prej saj.
Një vit pas serisë së parë, regjizorja Këlliçi ka hedhur në treg serinë e dytë të telenovelës, të cilën ‘kunati’ i saj Belo Këlliçi po tenton t’a paraqesë në skenën e SHQUP-it si Babale 3, ndoshta me shpresë për të rrëzuar qeverinë Rama, pas dështimit me Babale 1 (Salianji) dhe Babale 2 (Bardhi).
TemA
