Nga fshati Lipë i Përmetit kandidatja socialiste Mirela Kumbaro pohoi se projektet e Rilindjes Urbane për përmirësimin e fasadave të qyteteve, janë në radhë të parë projekte që ndikojnë drejtpërdrejt në përmirësimin e jetës së qytetarëve dhe cilësinë e shërbimit të biznesit.
“Si na kritikojnë ata që nuk bënë asgjë për 8 vjet apo në 4 vjet ai kryetari i bashkisë që fjeti gjumë dhe e mbuloi Tiranën me plehra. Na kritikojnë se bëjmë projekte fasadë. Në fakt ato janë projekte që përmirësojnë në radhë të parë jeten e qytetarëve që jetojnë aty, në radhë të dytë përmirësojnë cilësinë e shërbimit të biznesit, se është një mundësi investimi për lokalet, dyqanet, restorantet, për hotelet, për ta bërë kështu Përmetin qytetin më interesant per turistët” – u shpreh Kumbaro.
Kumbaro solli në vëmendje vitet e gjata të harresës për një zonë të bekuar me pasuri natyrore si Përmeti. Ajo u shpreh se të gjithë duhet tu jenë mirënjohës përmetarëve që janë kujdesur për vendin e tyre, ndërkohë që kanë qenë të braktisur dhe të harruar nga qeveritë e 27 viteve.
“Me çfarë do ta zhvillojmë Përmetin? Këtë qytet që disa gjëra ia ka dhënë Zoti apo natyra? i ka dhënë ujin, pyjet, natyrën, fshatrat e bukur, një qytet shumë të bukur, i ka dhënë sidomos njerëz të jashtëzakonshëm të cilëve ne u jemi shumë mirënjohes dhe ju kërkoj një ndjesë shumë të thellë sepse Përmeti është mbajtur nga përmetarët, ndërsa të gjitha qeveritë e kanë pasur Përmetin si një xhep të harruar diku ku as doren nuk e fusnin. Kur kaloje dikur nga Tirana për në Gjirokastër nuk të shkonte mendja të ktheheshe te Ura e Leklit majtas, sepse askush nuk të thoshte: ktheu këtu majtas se këtu është një zonë e jashtëzakonshme, është Përmeti, Frashëri, Dangëllia, Çarshova”, një zonë blegtorale e bujqësore e jashtëzakonshme e cila sikur të ishte administruar me zgjuarsi do të ishte sot zona më e pasur në Shqipëri, sepse ka burimet natyrore dhe njerëzit punëtorë. Kaq i duhet Përmetit” – vijoi më tej në fjalën e saj kandidatja socialiste.
Kumbaro kërkoi nga banorët e Lipës mbështetje për skuadrën që kërkon të bëjë shtet dhe të vazhdojë reformat e nisura në çdo cep të Shqipërisë.
“Kjo skuadër ka treguar se di të punojë, ka treguar se nuk do pushtet, por di të bëjë shtet, prandaj ditën e votimeve duhet të votoni nr 2, Partinë Socialiste në fletën e votimit, për Edi Ramën, për gjithë skuadrën e partisë socialiste” – përfundoi Kumbaro.
