Deputeti i Partisë Socialiste Ben Blushi ka vizituar sot lagjen e Trimave në Kumanovë e banuar kryesisht nga shqiptarë, e cila pak ditë më parë u përfshi në një aksion policor, ku mbetën të vrarë 22 persona.
Blushi, i pari politikan shqiptar i cili viziton Kumanovën që pas aksionit, është takuar me banorët e kësaj zone. Në fjalën e tij me banorët, Blushi është shprehur se gjatë aksionit atyre u është cënuar padrejtësisht të drejtat. Ndërkohë deputeti i PS, i cili së fundmi ka shtuar edhe zërat kritikë brenda qeverisë, e ka cilësuar si të pabesë shtetin maqedonas.
Sipas tij rasti i Kumanovës ishte i frikshëm për shqiptarët dhe për vetë Maqedoninë.
“Jam këtu për të parë ç’po ndodh me civilët e pafajshëm. Ju kanë cenuar pronat dhe dinjitetin njerëzor. Ju kanë cenuar pabesisht dhe padrejtësisht. Kur shteti është i pabesë, ky është fundi i tij. Maqedonia sot ka një problem serioz me demokracinë dhe më vjen keq të them, por ajo nuk është një shtet demokratik.”, ka thënë Blushi.
