Banorët e Lagjes së Trimave në Kumanovë kërkojnë para dhe jo tenderë për ndërtimin e shtëpive të tyre. Banorët e Kumanovës e kanë unifikuar mendimin e tyre, sipas të cilit atyre që u janë shkatërruar shtëpitë gjatë përleshjeve të armatosura të 9 dhe 10 majit në disa nga rrugët e kësaj lagje, nuk kanë nevojë për tendera. Komisioni për vlerësimin e dëmeve deri tani ka përpiluar raportin me vlerësimet e dëmeve dhe shtëpive të shkatërruara, ndërsa Qeveria javën e ardhshme do të vendos për mënyrën dhe afatet e realizimit.
Qeveria ka vendosur që të kompensojnë financiarisht për 100 për qind dëmet e shkaktuara më 9 dhe 10 maj. Banorët megjithatë insistojnë që Qeveria t`ua lëshojë shumën e parave të dëmit të pësuar dhe se ata më pas do të ndërtojnë shtëpitë.
Derisa po vazhdon procedura institucionale, banorët deri tani kanë marrë paratë prej 100 mijë denarëve apo 1.500 euro si kompensim fillestar për harxhime jetësore, por edhe një shumë të parave për qiratë e përkohshme. Nga ana tjetër, në këtë lagje kanë mbërritur edhe sasi të mëdha të ndihmave humanitare, në para dhe ushqime, si dhe gjësende të tjera që u janë shpërndarë banorëve të lagjes.
Sipas komisionit qeveritar dhe atij komunal për vlerësimin e dëmeve mësohet se janë 68 objekte që kanë pësuar dëme, prej të cilave 28 shtëpi janë vlerësuar si “të shkatërruara plotësisht”. Rreth 130 familje kanë mbetur deri tani pa kulm mbi kokë dhe se ato janë strehuar përkohësisht në shtëpi me qera apo tek të afërmit e tyre, referon INA.
