Presidenti i Republikës së Shqipërisë, Bujar Nishani i është rikthyer ngjarjes së përgjakshme ë Kumanovë, ku ka theksuar se ajo ka lënë shumë pikëpyetje. Në një intervistë për gazetën kosovare “Koha Ditore”, Presidenti Nishani shprehet se për të pasur një hetim të besueshëm duhet këmbëngulur në përfshirjen e ndërkombëtarëve.
Kreu i shtetit shqiptar tha se ka paqartësi në elementet thelbësore të ngjarjes, përfshirë këtu edhe viktimat.
Ai nuk beson që e vërteta dhe zanafilla e asaj që ka ndodhur në Kumanovë do të dalë nga hetimi i zhvilluar prej autoriteteve maqedonase. Prandaj ai kërkon përfshirjen e ndërkombëtarëve.
Presidenti Nishani ka folur edhe për peshën që kanë shqiptarët në Maqedoni për mbajtjen gjallë të këtij shteti.
Ai nënvizoi se nëse nuk zbatohet plotësisht Marrëveshja e Ohrit, hendeku midis shqiptarëve dhe maqedonasve do të rritet.