Ka shkuar në 34 numri i të arrestuarve në fazën e shtatë të operacionit të koduar “Qarku” në Shkodër për kultivimin e bimëve narkotike. Policia njofton se së fundi është arrestuar një 32-vjeçar në Dajç, i cili kishte përshtatur një dhomë të banesës së tij, për kultivimin e bimëve narkotike, me anë të llambave elektrike.
Gjatë kontrollit në ambientet e banesës janë gjetur 20 fidanë të dyshuar narkotikë të kultivuar në vazo plastike, bimë të dyshuara narkotike në proces tharjeje dhe lëndë të dyshuar narkotike kanabis me peshë rreth 1.2 kg, të cilat janë sekuestruar në cilësinë e provës materiale, së bashku me pajisjet elektrike që shërbenin për kultivimin e bimëve narkotike në ambiente të mbyllura. Atij i është gjetur dhe sekuestruar edhe një armë zjarri pushkë.
Në 7 fazat e megaoperacionit policor antikanabis të koduar “Qarku”, janë vënë në pranga 34 shtetas, si dhe janë sekuestruar në total, 270.7 kg kanabis, 476 bimë dhe fidanë kanabisi, dhjetëra doze kokaine, pajisje që shërbenin për përpunimin e kanabisit, 2 armë zjarri, municion luftarak, 1 armë sportive, 4 automjete dhe 16 aparate celulare.
/a.r
