Armando Cungu do të jetë trajneri i ri i Kukësit për sezonin e ardhshëm. Ky është zyrtarizimi i ardhur nga ana e verilindorëve gjatë ditës së sotme, të cilët kanë rikthyer teknikun shkodran në pankinë, pas atij suksesi të arritur në Europë pak vite më parë.
Nga ana tjetër edhe Cungu është shprehur i lumtur për këtë rikthim të tijin, duke e konsideruar si një shans të dytë të dhënë nga Gjici. Gjithçka është e qartë, sfida e madhe nis që me takimin e ardhshëm, atje ku Kukësi duhet të kualifikohet ndaj Valletës në transfertë, pavarësisht barazimit pa gola në takimin e parë.
“Si fillim falënderoj presidentin, Safet Gjici për mundësinë e dytë që po më jep. Kam besimin tek futbollistët si dhe tek drejtuesit e klubit të FK Kukësit dhe patjetër që pretendojmë kualifikimin ne ndeshjen kundër Valletës që zhvillohet ditën e martë, ndaj do bëj maksimumin që ta bëj realitet këtë gjë.
Ekipin e njoh sepse disa futbollistë i kam stërvitur, ndërsa të tjerë i kam pas edhe kundërshtarë, kurse lojtarët e huaj kam mundësinë që ti njoh më mirë ndërmjet ndihmës së kolegut tim R.Hallaçi, si dhe drejtorit Nexhipi. Për sa i përket trajnerit Pakult, shpreh respekt për atë që ka dhënë për Kukësin”, ka thënë Cungu raporton Vipsport./a.m.
