Komisioni i Ankimimeve dhe Sanksioneve nuk ka pranuar të kalojë në shqyrtim kërkesën e Partisë Demokratike, e cila ankimoi vendimin e Komisionerit Shtetëror të Zgjedhjeve, Ilirjan Celibashi, për të pasur vetëm një anëtar të kësaj force politike në komisione zgjedhore për votimet vendore në Kukës.
Sipas kryekomisionerit Celibashi Partia e Lirisë figuron si partia më e madhe opozitare bazuar në rezultatin e zgjedhjeve të 14 majit të cilët i takojnë dy komisionerë, PD zyrtare një dhe tre të tjerë partia me e madhe PS.
Zgjedhjet për kryetar Bashkie në Kukës do të mbahen më 24 shtator, pas shkarkimit të Safet Gjicit i cili u përfshi në një videoskandal. Gjici është i arrestuar nën akuzën korrupsion pasiv.
PD nuk bie dakord qe Partia e Lirisë të konsiderohet si partia më e madhe opozitare pasi sipas tyre konfuzon demokratët
Teksa ndodhemi në prag të nisjes së fushatës për Kukësin, Sali Berisha dhe Ilir Meta duket se kanë zbehur koalicionin e tyre të 14 majit Bashkë Fitojmë.
Meta nuk ka shprehur interes për të pasur kandidat, ndërsa Rithemelimi nuk ka qartësuar asnjë kandidat. Më herët u mësua se Lulzim Basha ka shprehur mbështetjen për kreun e degës së Kukësit Arif Rexhmati, por vetë dega e Kukësit është në kërkim të një kandidati të unifikuar.
Pas thyerjes së besimit nga Safet Gjici, Partia Socialiste kërkon nga kuksianët ti besojnë votën Albert Halilajt./m.j
