Deputeti socialist Taulant Balla, ka publikuar në llogarinë e tij pamjet nga ajri të protestës që u zhvillua sot në Tiranë, e thirrur nga opozita. Ai sulmon Berishën dhe njëkohësisht e ironizon atë, duke thënë se për këtë betejë politike do shihen në 14 Maj, dita e zgjedhjeve lokale.
“REVOLUCION?! Sali Berisha ti kujton se shqiptarët besojnë që ti s’ke vrarë në 21 janar?! Apo që ti dhe të tutë s’keni hedhur në erë Gërdecin për t’u shitur amerikanëve fishekë kinezë?
Sali Berisha ti ke grabitur dhe ke shkatërruar sa ke mundur, duke e katandisur Shqipërinë në vendin që nuk e vizitonte më asnjë kryeministër, me një kryeministër si puna jote që nuk e ftonte më askush.
Sali Berisha ty të gënjen mendja se duke ju thënë shqiptarëve se sot kishe 100 mijë veta në bulevard dhe 50 mijë para Kuvendit sa herë proteston. Nëse 2-3 mijë persona sot ty të duken 100 mijë, atëherë SUKSESE NË JETË! Shihemi më 14 Maj”, shkruan deputeti socialist Taulant Balla./m.j
