Pas refuzimit të kërkesës së tyre për azil, Gjermania ka një tjetër përgjigje negative për azilkërkuesit. Bëhet fjalë për mos lejimin e tyre që të shkelin sërish në territorin gjerman deri në një vendim të dytë të autoriteteve.
Është kreu i Zyrës Federale për Migracion dhe Refugjatë, Manfred Schmidt, i cili nga Nurembergu tha se vendimi ka hyrë në fuqi prej datës 1 gusht dhe një masë të tillë pritet ta ndërmarrin dhe shtetet e tjera te Shengenit si Norvegjia, Islanda, Zvicra e Lihtenshtejni.
“Nga 1 gushti ne kemi kompetencën të ndërhyjmë tek e drejta e qëndrimit, dhe të vendosim bllokimin e hyrjes në Gjermani dhe një ndalim qëndrimi për të gjithë hapësirën e Shengenit, po qe se kërkesa e këtyre azilantëve për azil është qartësisht e pabazë. Një të huaji të dëbuar apo rikthyer në vendin e tij nuk do t’i lejohet hyrja në Gjermani për maksimalisht pesë vjet. Këto sanksione, të bazuara në reformimin e fundit të ligjit për të drejtën e qëndrimit në Gjermani, mund të prekin jo vetëm azilkërkuesit nga Shqipëria, Kosova e vende të tjera të Ballkanit, por edhe nga Gjeorgjia e Tunizia. Ndërsa të huajt që janë të integruar mirë në Gjermani dhe deri më tani kanë qenë vetëm me “Duldung” “të toleruar” për një kohë të caktuar do të mund të qëndrojnë në Gjermani”. u shprej ai
