Nga Artur Ajazi
Pasi e ndoqa me kujdes “protestën popullore” të 16 shkurtit dhe të 21 shkurtit, pasi e ndoqa me kujdes fjalimin nxitës dhe tejet të varfër intelektualisht dhe politikisht për mbështetësit dhe pjesën fanatike të mbetur akoma në atë parti, pasi e ndoqa me kujdes kthimkurrizin ndaj apelit të ambasadorëve të SHBA, BE, Italisë, Gjermanisë, Britanisë Madhe, madje edhe të Japonisë për “mosdjegien e mandateve”, dhe shumë e shumë të tjera, kam të drejtën të pyes si qytetar i lirë i këtij vendi , kujt i shërbeni ju zoti Basha?
Partisë Demokratike, Sali Berishës, oborrtarëve milionerë të partisë tënde, Shqipërisë, Kosovës, popullit shqiptar, apo interesave tuaja personale ? Më rezulton se pas gjithë kësaj kohe që ju po bëni gjoja opozitën “rradikale”, po i shërbeni veçse interesave tuaja, veçse interesave të një grupimi tepër të ngushtë që ka kapur, dhe po e mban peng Partinë Demokratike, që nuk po e lë atë të ringrihet mbi inatet dhe mllefet, mbi interesat e pushtetarëve të përjetshëm dhe atyre që kurrë nuk e kanë dashur as partinë e dhjetoristëve, dhe as mirëqenien afatgjatë të shqiptarëve.
Kujt i shërbeni ju zoti Basha, kur keni 6 vjet, që PD e mbani peng të interesave të ngushta politike, për të mbajtur me çdo kusht karrigen e kryetarit, kur keni 6 vjet që humbisni dhe nuk bëni zgjedhje të lira në PD, që keni 6 vjet që nuk riorganizoni strukturat reale dhe statutore të PD, që keni 6 vjet që bojkotoni Parlamentin, që keni 6 vjet që nuk dëgjoni zërin kundër të shumicës brënda në PD, që keni 6 vjet që flisni në emër të “partisë dhe anëtarësisë” dhe nuk dini numrin e saktë të tyre, që pengoni zbatimin e reformës në drejtësi dhe institucioneve të pavarura.
Kujt i shërbeni ju zoti Basha, kur flisni “në emër të popullit” dhe kur ftoni shqiptarët, ose më mirë ndjekësit tuaj në protesta, dhe pastaj pasi i lini vetëm ata, kur deklaroni se “për pasojat e dhunës ndaj institucioneve nuk i mbaj unë përgjegjësitë, le të përgjigjet Rama”. Kujt i shërbeni ju zoti Basha, kur vendosni i “vetëm” në zyrën tuaj “të djegim mandatet”, dhe nuk merrni as miratimin e “bazës” së partisë të cilën asnjëherë nuk e keni pyetur për asgjë. Kujt i shërbeni ju zoti Basha, kur sulmoni dhe u ktheni shpinën selive të huaja diplomatike perëndimore partnere stradegjike të Shqipërisë, që prej vitesh ju këshillojnë të jeni pjesë e Parlamentit, miratimit
të ligjeve , dialogut dhe reformave aq të rëndësishme për vendin. Kujt i shërbeni ju zoti Basha, kur veproni sikur të jeni padroni i vetëm i Partisë Demokratike, i një force politike që ka mbetur sot pa historikun dhe muzeun e saj, pa simbolet e saj, pa kontribuesit e saj, pa lidershipin e saj, që ka mbetur e vetme dhe pa përkrahje ndërkombëtare , për kapriçot e dikujt që pasi e ka “mjelë” atë parti siç ka dashur, kërkon të lërë pas hijen e tij.
Kujt i shërben plani apo skenari juaj për ta lënë Partinë Demokratike pa asnjë përfaqësim në Parlamentin legjitim, kujt i shërben kokëfortësia juaj për ti mbyllur derën çdo këshille dhe sygjerimi që vjen nga kanceleritë e BE dhe përtej Atlantikut. Askujt nuk i shërben sjellja dhe vendosmëria juaj, për ta lënë rrugëve Partinë Demokratike, askujt nuk i shërben retorika dhe thirrjet e tua për “popullin” tek u kërkon ndjekësve të tu “të marrin në dorë fatet e tyre” në një shtet ligjor, në një vend demokratik, në një vend që pret me padurim hapjen e negociatave me BE.
Askush nuk fiton nga djegia e mandateve (në asnjë vend të lirë dhe demokratik) veç teje, dhe atyre që po plaken me xhepin plot me para pushteti, askush nuk fiton nga rruga e dhunimit të institucioneve veç atyre që nuk e duan stabilitetin dhe integrimin e vendit në BE. Ndaj për të gjitha këto, dua t’ju pyes, kujt i shërbeni ju zoti Basha ?
