Parkimi i gabuar në Tiranë është sa i zakonshëm, aq edhe stresues. Ndodh në çdo rrugë, e për pasojë edhe policia e kryeqytetit njofton se ngriti me karrotrec 15 automjete, duke e çuar në 65 numrin e makinave të dërguara në pikën e bllokimit të Komisariatit të Policisë Rrugore.
“Në vijim të masave të shtuara nga Policia Rrugore e Tiranës në bashkëpunim me Komisariatet e Policisë në Tiranë, shërbimet e Komisariatit të Policisë Nr. 2 së bashku me shërbimet e Komisariatit të Policisë Rrugore Tiranë kanë vijuar zbatimin e planit të masave duke shtuar monitorimet në rrugët e brendshme të kryeqytetit me qëllim evidentimin dhe ndëshkimin e drejtuesve të automjeteve që bëhen pengesë për qarkullimin normal të automjeteve të tjera dhe këmbësorëve si dhe krijojnë trafik në lëvizje për shkak të parkimit në mënyrë të gabuar. Si rezultat i monitorimeve, në zona të ndryshme të Tiranës, janë spostuar me mjet ngritës 15 automjete, duke e çuar numrin në 65 automjete të spostuara me mjet ngritës dhe dërguar në pikën e bllokimit të Komisariatit të Policisë Rrugore”, thuhet në një njoftim të policisë së Tiranës.
Po sipas kësaj të fundit, kontrollet e tilla do të vijojnë në të gjithë Tiranën, me qëllim lehtësimin e lëvizjes së lirë të automjeteve dhe këmbësorëve. Ndaj dhe Policia Rrugore e Tiranës “apelon për të gjithë drejtuesit e automjeteve të mos parkojnë në vendet ku bëhen pengesë për qarkullimin normal të lëvizjes së lirë të automjeteve të tjera apo për lëvizjen e lirë të këmbësorëve, por të zbatojnë me rigorozitet sinjalistikën rrugore pasi automjetet që do të konstatohen do zhvendosen me mjet ngritës në pikën e ruajtjes”.
