Rreth 200 fermerë grekë bllokuan sot me traktorët e tyre postën kufitare me Maqedoninë në Evzoni (veri), në shenjë proteste kundër masave shtrënguese të qeverisë, bëhet e ditur nga burime të policisë.
Kjo protestë ka penguar kalimin e disa dhjetëra kamionëve me destinacion Serbinë dhe Maqedoninë, sipas së njëjtit burim.
“Me reformën e taksimit të të ardhurave dhe të rritjes së kontributeve, jemi të detyruar të paguajmë 47 për qind të të ardhurave tona”, u ankua Jorgos Sidhiropulos, anëtar i komitetit të koordinimit dhe lëvizjes në rajon.
Nën presionin e kreditorëve të saj, BE dhe FMN, Greqia miratoi vitin e kaluar një paketë ligjesh që hyri në fuqi më 1 janar dhe që parashikon rritje të taksave ndaj fermerëve dhe të kontributeve të tyre, duke nisur nga masa të parashikuara për profesionet e pavarura dhe të punësuarit./b.d
