Kurban Bajrami festohet sot në gjithë vendin, ku besimtarët myslimanë i janë drejtuar xhamive e shesheve kryesore të qyteteve për të falur namazin, ndërsa kanë kërkuar më shumë paqe e harmoni.
Në Vlorë ceremonia e faljes së Kurban Bajramit nisi herët në mëngjes, ku dhjetëra besimtarë myslimanë falën namazin në sheshin para xhamisë së Plumbit. Kreu i Myftinisë së rrethit Vlorë, Armand Asllani, në fjalën e tij theksoi dhe kërkoi më shumë dashuri e harmoni mes njerëzve.
Në Fier, në orët e para të mëngjesit, besimtarët kanë falur Namazin ne xhaminë e qytetit, ndërsa krerët myslimanë të myftinisë kanë përcjellë urime për paqe dhe harmoni mes njerëzve. Namazi u fal në orën 07:10, ndërsa ceremonisë së faljes i parapriu me fjalën e tij myftiu i Fierit, Mikel Hazizolli. Ai përcolli mesazhin për më shumë paqe dhe respekt ndaj njëri-tjetrit, e sidomos për më shume besim, duke konsideruar njeriun si pasurinë më të madhe të krijuar nga Zoti.
Besimtarët myslimanë në të gjithë botën këtë të martë kanë kremtuar festën e Kurban Bajramit. Ndryshe nga një vit më parë besimtarët, këtë vit faljen e namazit e kanë bërë në sheshet e qyteteve. Në Berat qindra besimtarë kanë falur namazin në pedonalen e qytetit nga imam Ainald Mali. Pas faljes besimtarët kanë uruar njëri tjetrit në këtë ditë të shenjë.
Në Lushnje, falja e namazit është mbajtur në sheshin kryesor të qytetit para bashkisë. Në këtë ditë të shënuar për fenë islame, faljen e drejtoi imami i xhamisë, Genti Hyka.
Edhe në Kukës besimtarët janë bërë bashkë për të falur Kurban Bajramin Besimtarët myslimanë kanë falur Kurban Bajramin në dy xhamitë e qytetit dhe në fshatra. Myftiu Fation Isufi ka drejtuar faljen e Kurban Bajramit në xhaminë kryesore të qytetit ndërsa përcolli edhe urimet për gjithë besimtarët mysliman. Pas faljes, besimtarët uruan për fat e mbarësi.
Falja e Namazit në Durrës u krye në sheshin para xhamisë së madhe në qendër të qytetit bregdetar. Imami Ervin Qylafku bëri thirrje për dashuri e paqe mes njerëzve.
g.kosovari
