“Ku qëndron problemi këtu”/ Brisi i Tatimeve akuza qeverisë për inceneratorët nga Partia e Lirisë: Punonjësi i thjeshtë u bë pronar

Partia e Lirisë ka publikuar të tjera prova për aferën e inceneratorëve. Brisida Shehaj në një konferencë për shtyp zbuloi dokumenta sesi një punonjës i thjeshtë, i inceneratorit të Elbasanit është kthyer në pronar.

Sipas Shehaj, punonjësi, emri e të cilit nuk e bëri me dije është bërë pronar, duke lidhur kontrata me biznesmenët e  inceneratorëve, Klodian Zoto dhe Stela Gugallja. Ajo i bëri thirrje SPAK që të hetojë këtë aferë.

“Bëhet fjalë për një punonjës që ka nisur karrierën e tij, E.B, i datëlindjes ‘93. Bëhet fjalë për 500 euro të dhënë borxh për këtë punonjës. Më pas jep tokën me qira dhe me pas e revokojnë. Integrated Energy B.V. e shet tokën te ky punonjës në një vlerë 135 milion lekë. Më pas kemi një certifikatë që ai ka në Sharrë. Këto janë të gjitha në zonën ku është inceneratorit. Bëhet fjalë për një kontratë që ka lidhur me kompaninë e Stela Gugalles. Në AZHBR ka fituar një fond për ndërtimin e një sere. Kemi një prokurë ku i jepet e drejta të administrojë të gjithë inceneratorin e Tiranë. Në 1 prill autorizon dy individë për të hapur një kompani në Mal të Zi. Dhe në fund kemi një kontratë me kompaninë e Klodian Zotos”, deklaroi Shehaj.

Shehaj tha gjithashtu se dokumentet do t’ja vënë në dispozicion edhe ministres Belinda Balluku dhe kryeministrit Edi Rama. “Ne kemi edhe dokumenta të tjera sidomos për pjesën e kompanive të hapura në Mal të Zi. SPAK të hapë regjistrin e noterëve, dhe do të  shohin jo vetëm këtë punonjës, por edhe të tjerë që kanë hapur kompani në Mal të Zi me prokura të posaçme të bëra në Shqipëri. Emrin nuk e bëjmë publik dhe do t’ja kalojmë SPAK, edhe ministres Balluku dhe kryeministrit Rama, që nuk di çfarë firmos”, tha ajo.

g/kosovari