Kryeministri Edi Rama ishte ditën e sotme në Thumanë ku deklaroi se Viti i Ri do t’i gjejë familjet e prekura në shtëpitë e reja që janë ndërtuar.
“Në 2-3 ditët në vijim njerëzit do të fillojnë të hyjnë në apartamentet pas meje dhe pastaj në shtëpitë individuale që në prag të Krishtlindjeve të rikthehemi në një festë të madhe dhe të ndezim pemën e ullirit të paqes dhe begatisë, që do të kthehet në një simbol të kujtesës dhe shpresës. Janë 433 familje që rikthehen në kushte me pallate me standarde të larta” tha ai.
Në kantier, kreu i qeverisë u prit nga një prej drejtuesve të firmës së ndërtimit. “Ku je more demokrat” i tha Rama, që më pas e falënderoi për punën, që sipas tij është e jashtëzakonshme.
Gjatë fjalës së tij nuk munguan edhe batutat. “Filloi edhe shiu që uroj që të paralajmërojë bereqet për të gjitha këto familje të lënduara”.
Rama foli edhe për kritikët që sipas tij thonë “se këto nuk janë bërë me lekët e shtetit por me të qytetarëve”.
“Patjetër që ne kemi bërë detyrën se ndërkohë që flas ka aty në Fb tim ka që thonë që hë se detyrën keni bërë s’i keni bërë me lekët tuaja hë se lekët e popullit janë hë mo së këto nuk janë falas se i paguan populli.
Tani qeveritë për të bërë detyrën janë jo për të bërë vezë të kuqe jo për të bërë magjira por për të administruar të ardhurat. Dallimin mes qeverisë s’e bën fakti që kush i bën me lekët e veta e kush me lekët e popullit por i bën me faktin sa mirë e sa keq administrohen të ardhurat”.
Rama tha se me shpërndarjen e banesave për familjet e prekura nga tërmeti është zgjidhur edhe cështje e dy apo më shumë kurorave në një kulm çatie.
Këtu Rama bëri batutë edhe me marrëdhëniet nuse-vjehrrë.
“Atyre që janë prekur nga tërmeti s’u kërkohet asnjë kontribut financiar e asnjë lloj kredie por i marrin falas.
Shumica e këtyre familjave që kanë marrë e do marrin shtëpitë janë familje që s’do ia dilnin dot kurrë sikundër është bërë një plus se kudo ku të dëmtuarit nën një kulm kanë qenë më shumë se një kurorë përfitojnë aq apartamente sa kanë kurora.
Në këtë rast lehtësojmë dhe vjehrrat me nuset nga të qëndruarit në një kulm e u japim mundësinë të duhen më shumë duke qenë secila në kulmin e vet”./m.j
