Policia shqiptare zbuloi dy grupe kriminale që trafikonin përmes postës lëndë narkotike cannabis sativa nga Amerika dhe Tajlanda në Shqipëri. A2 CNN mëson se lënda narkotike ishte nisur me Postën Shqiptare nga Amerika për në Tiranë me 1 pako e cila ishin sjellë me pretendimin se në të ishin fara për bar për fusha futbolli.
Ndërsa nga Tajlanda lënda narkotike ishte sjellë në 5 pako të kamufluara si noodle (makarona aziatike) dhe të paketuara për t’u kamufluar.
Në operacionet “Destinacioni 1” dhe “Destinacioni 2” policia vuri në pranga 3 persona dhe shpalli në kërkim 3 të tjerë. Policia ka sekuestruar 4 kilogramë cannabis sativa me përqindje të lartë THC, që dyshohet se do të shiteshin në Tiranë dhe në Elbasan, si edhe një sasi kokaine që u gjet në banesën e njërit prej këtyre shtetasve.
Lënda narkotike THC ka cilësi shumë të lartë dhe në treg kap çmim që krahasohet gati me kokainën. 3 gramë THC kushton rreth 100 euro.
