Ka një rrëmujë të madhe këto orë, siç ndodh rëndom kur partitë duan të fshihen pas frazave dhe formulimeve të ngatërruara, në lidhje me pikat që mbajnë ende pezull marrëveshjen për draftin e reformës në drejtësi. Lulzim Basha ka bërë paralajmërimin e fortë të rradhës, duke u përbetuar se nuk do ta votojë reformën pa rënë këto dy pengesa të fundit. Në një ndërhyrje në studinj e Fevziut mbrëmë, Basha u shpreh se “Mbrëmë u ra dakord për të votuar variantin hibrid. Por për fat të keq konsensusi u prish në mesnatë, pasi u fut një dispozitë poshtëruese, përjashtuese për shqiptarët që dëshirojnë të aplikojnë në organet e vetingut. Theksoj se ky është një propozim poshtërues sepse cënon normat dhe të drejtat e njeriut. Kam biseduar sot me përfaqësuesit më të lartë të SHBA dhe BE dhe kam besimin tim të patundur se një normë e tillë ligjore, e padenjtë do të hiqet. PD në emër të çdo shqiptari edhe të votuesve ka arritur një fitore për ta sjell draftin kushtetues këtu ku është sot me norma dhe standarde të bazuara në Komisionin e Venecias. Nuk duhet të kishte qenë një betejë, por kështu e bëri kundërshtari ynë politik (Rama). PD do të votojë për miratimin në parim, por ky poshtërim do të bjerë se nuk ka rrugë tjetër. Ne do të vazhdojmë përpjekjet tona. Sovraniteti është një përgjegjësi kushtetuese dhe llogari kushtetuese japin institucionet kombëtare shqiptare. Të huajt kanë rol monitorimi. Kjo është një betejë e PD e fituar për kushtetutshmërinë”, tha Basha.
Përtej dramatizimit që Lulzim Basha e ka shumë të avancuar në deklarimet e tij publike, ajo që shihet qartë është se opozita tani pretendon një modifikim më tepër, vetëm pak orë para votimit. Është ky pretendimi i rradhës pas nenit 88 dhe çeshtjes së sovranitetit, që Basha e Bylykbashi po e servirin si pretekst për të bllokuar dhënien e konsensusit për reformën. Dhe si i tillë, pra si pretekst, ky pretendim është thjeshtësisht i zbërthyeshëm, pasi është i dobët dhe pa bazë.
Nëse i hedhim një sy draftit të reformës, në faqen 92, tek pjesa e aneksit, neni B per operacionin nderkombetar te monitorimit, pika e tretë, gërma a, thotë se vëzhguesi ndërkombetar ushtron këto detyra: paraqet gjetje dhe mendime mbi çeshtje që shqyrtohen nga Komisioni dhe nga Kolegji i Apelimit, si dhe kontribuon për kontrollin e figurës sipas nenit D, pika H. Lidhur me këto gjetje, vëzhguesi ndërkombëtar mund të kërkojë që Komisioni ose Kolegji i Apelimit të marrë në shqyrtim prova ose të paraqesë prova të marra nga organet shtetërore, entitetet e huaja ose personat privatë, sipas ligjit.
Pra gjithcka, çdo lloj prove e marrë nga organet kompetente shqiptare apo të huaja, trajtohen sipas ligjit shqiptar që përcakton cilat informacione janë të hapura, cilat janë sekret dhe cilat konsiderohen prova etj.
Ndërkohë, të gjithë gjyqtarët që do konkurojnë dhe do jenë pjesë e vetingut do të kene te drejten e ankimitit te vendimit te komisionit te vetingut ne kolegjin e apelimit, madje edhe në Gjykaten Europiane per te drejtat e njeriut. (Neni F i aneksit, faqja 100).
Sa i takon anëtarëve të komisionit të vetingut, pretendimi i Bashës ka një “truk” nga pas. Është e vërtetë që anëtarët e vetingut bazohet mbi kritere që përjashtojnë ankimimin. Pra një kandidat që nuk pranohet nuk ka të drejtë të ankimojë diku tjetër. Por a nuk vepron kështu edhe kreu i shtetit, kur hap garën p.sh për postet e gjyqtarëve?! Nëse i hidhni një sy aplimimeve që Nishani mbledh në këtë rast, për një post të tillë aplikojnë 20 apo 30 veta dhe fiton një i vetëm. Dhe ata që skualifikohen nuk kanë të drejtë ankimimi. Pra është një aplikim për një post pune, që në rast se nuk fitohet nuk të jep të drejtën të ankimohesh.
Kjo është krejt e ndryshme nga verifikimi i gjyqtarëve e prokurorëve të cilët mund të ankimojnë kur rrëzohen nga vetingu. Dhe ky është elementi që zoti Basha bën sikur nuk e kupton.
