Presidenti Ilir Meta i ka dërguar mesazh Kryeministres së Mbretërisë së Danimarkës, Mette Frederiksen, e cila fitoi zgjedhjet e së mërkurës.
Meta e përgëzon për detyrën dhe shpreh besimin se Danimarka e kryesuar nga ajo, do të përforcojë marrëdhëniet më Shqipërinë dhe do të na mbështesë në rrugëtimin Bashkimit Evropian.
Kujtojmë se Frederiksen, liderja e Partisë Socialdemokrate të qendrës së majtë, është e dyta femër kryeministre në Danimarkë pas Helle Thorning Schmidt që ishte në pushtet në 2011-2015.
Letra e plotë:
E nderuar Zonja Kryeministre,
Me rastin e zgjedhjes Suaj në postin e lartë të Kryeministres së Mbretërisë së Danimarkës, me kënaqësi të veçantë dëshiroj t’Ju dërgoj urimet më të përzemërta për përmbushjen me sukses të kësaj detyre të rëndësishme!
Shpreh besimin e plotë se përvoja Juaj e madhe por edhe raporti i veçantë i anëtarëve të kabinetit tuaj me vendin tim do të ngrejë në një nivel edhe më të lartë marrëdhëniet shumë-planëshe midis Shqipërisë dhe Danimarkës në interesin më të mirë të përbashkët.
Kam bindjen, Zonja Kryeministre, se nën drejtimin Tuaj, Qeveria e Mbretërisë së Danimarkës do të vijojë mbështetjen e paçmuar në rrugëtimin e vendit tim drejt Bashkimit Evropian.
Duke Ju përgëzuar sërish për këtë detyrë shumë të rëndësishme, si dhe duke Ju siguruar për miqësinë e thellë të popullit shqiptar dhe timin personal për popullin Tuaj, Ju lutem pranoni, e nderuar Zonja Kryeministre, përshëndetjet e mia më të përzemërta!/l.m
