Një mësuese e arsimit 9-vjeçar në fshatin Domgjon në Mirditë është hequr nga puna gjatë kohës që ishte me leje lindjeje. Vera Marku tashmë ka nisur betejën e saj për rikthimin në vendin e punës që kishte prej 27 vitesh.
Nëna e tetë fëmijëve thotë se nuk ka asnjë të ardhur tjetër, pasi edhe të shoqin ia kanë larguar nga puna një vit më parë. Sipas saj, ajo është njohur me faktin se ishte hequr nga puna vetëm kur ka tentuar të rikthehet në vendin e saj të punës si mësuese.
Drejtoria Arsimore në Lezhë nuk i ka komentuar ende pretendimet e Vera Markut, me arsyetimin se fillimisht po njihet me dokumentacionin që lidhet me rastin në fjalë.
