Komiteti Shqiptar i Helsinkit ka reaguar përmes një deklarate shpërndarë për mediat në lidhje me videon skandaloze ku fëmija 3-vjeçar dhunohet në kopshtin privat “Diren” në Sauk. KSHHdënon me forcë dhunën dhe bën apel që ngjarje të tilla të mund të parandalohen.
Ja deklarata e KSHH:
“Tronditës dhe njëkohësisht rrëqethës është rasti që transmetoi mbrëmë emisioni investigativ “Stop” në TV Klan. Opinioni shoqëror indinjohet kur shikon pamje të tilla, në kopshtin privat të Saukut, ku shfaqet administratorja A.Sh, e cila godet në mënyrë barbare dhe të përsëritur fëmijët. Këto sjellje brutale janë të patolerueshme dhe përbëjnë shkelje flagrante të ligjit, duke shkaktuar pasoja të dëmshme fizike dhe psikologjike në shëndetin e fëmijëve. Është gjithashtu e patolerueshme që këto akte demonstrohen nga individë, të cilët më parë kanë ushtruar funksionin e gazetarit. Media e shkruar dhe audiovizive informon për raste dhune të rënda dhe tronditëse ndaj grave dhe fëmijëve. Në mënyrë të veçantë, pamjet e transmetuara nga media investigative në vendin tonë janë rrëqethëse dhe të papranueshme në një vend demokratik që aspiron integrimin në Bashkimin Evropian.
Këto raste kanë si viktimë gruan, e cila dhunohet edhe kur nëpërmjet gjykatës kanë siguruar urdhra mbrojtjeje. Motivet mund të jenë të ndryshme, por disa prej tyre nuk janë të rastit. Ato janë pasojë e konflikteve të mëparshme, madje për këto ngjarje janë në dijeni të njerëzve të afërm, fqinjëve dhe të organeve të policisë së shtetit.
Të ndërhysh për të parandaluar një vepër kriminale është detyrë qytetare, është e ligjshme dhe në shërbim të shoqërisë. Organet kompetente duhet të zbatojnë legjislacionin në fuqi, i cili ka rritur standardet e mbrojtjes së viktimave të dhunës në familje. Prokuroria në raste të tilla është organi kompetent për të filluar çështjen penale. Megjithatë, KSHH-ja vlerëson se nuk është bërë sa duhet në drejtim të parandalimit të këtyre rasteve. Ngjarje të tilla kërkojnë reflektim të menjëhershëm nga organet kompetente dhe përsëritja e tyre evidenton mungesën e efektivitetit të masave të marra deri më tani”, thuhet në deklaratë.
