Gjykata Kushtetuese e Maqedonisë në mbledhjen e caktuar për 31 maj do ta shqyrtojë nismën rreth kushtetutshmërisë dhe ligjshmërisë së vendimit për ndërtimin e kryqit në komunën Butel të Shkupit, vendim ky që i riti tensionet ndëretnike në fund të shkurtit dhe fillim të marsit të këtij viti.
Agjencia e lajmeve Meta raporton se, megjithëse në informatën e Kushtetueses nuk përmendet në mënyrë eksplicite se nisma ka të bëjë me ndërtimin e kryqit në Butel dhe kush është iniciuesi, megjithatë, sipas datës së cekur, 23 shkurt, që është data e vendimit të Komunës Butel për ndërtimin e kryqit, kuptohet se Gjykata do të prononcohet pikërisht rreth tij, citohet Express.
Vendosja e themelit për kryqin shkaktoi tendosje, pasi që anëtarë të BDI-së dhe banorë të komunës fqinje shqiptare, Çair, ndërtuan një kamp në vendin ku nisi ndërtimi i tij, në kufi mes dy komunave. (b.an)
