Ndërsa marrëveshja e armëpushimit në Gaza duket se është në proces e sipër, Komiteti Ndërkombëtar i Kryqit të Kuq paralajmëron se hapi tjetër, lirimi i pengjeve izraelite dhe të burgosurve palestinezë, mund të jetë jashtëzakonisht sfidues.
Sipas mediave të huaja, Christian Cardon, zëdhënësi kryesor i KNKK-së, tha se ky proces do të jetë më sfidues se marrëveshjet e mëparshme, duke pasur parasysh shkallën dhe shpejtësinë e operacionit.
Afati prej 72 orësh për lirimin e pengjeve është një afat kohor “jashtëzakonisht” i ngushtë, tha ai, shkruan A2 CNN.
KNKK pritet të luajë një rol në shkëmbimin e pengjeve dhe të burgosurve, siç bëri gjatë lirimeve në dy armëpushimet e mëparshme, por tha se nuk i janë dhënë detaje për operacionin.
“Kolegët tanë po përgatiten për të gjithë skenarët e mundshëm”, tha Cardon.
Izraeli ka publikuar sot listën e 1,950 të burgosurve palestinezë që do të lirohen.
Veçanërisht, nuk përfshihen të burgosurit palestinezë më të profilit të lartë, siç është Marwan Barghouti, një udhëheqës i shquar i Fatahut.
