Kryetari i Partisë Demokratike të Kosovës (PDK), Memli Krasniqi ka shkuar sot për vizitë tek familja e ish-presidentit Hashim Thaçi në Burojë të Skenderajt dhe tek familja e ish-kryeparlamentarit Kadri Veseli në Mitrovicë.
Gjatë takimeve në dy familjet e ish-themeluesve të UÇK-së dhe PDK-së, Krasniqi ka shkruar në faqen e tij në ‘Facebook’ se Kosova mburret me ta dhe e pret kthimin e tyre, sepse siç ka thënë ai, e tillë ishte lufta për çlirim – e drejtë, e pastër dhe fitimtare.
“Në Burojë dhe në Mitrovicë, në dy shtëpitë atdhetare që ishin frymëzim për çdo mendje e zemër patriotike, për t’i takuar prindërit dhe familjarët e dy liderëve tanë që shënuan historinë e përpjekjeve të shqiptarëve të Kosovës për liri, pavarësi dhe shtet-ndërtim, Hashim Thaçi dhe Kadri Veseli”, thuhet në postim.
“Malli për djemtë e tyre, që padrejtësisht po mbahen në Hagë, është i madh. Sytë e tyre e flasin këtë, ashtu siç balli i tyre e rrëfen një jetë të tërë me sakrifica. Por, krenaria për bijtë e tyre dhe për vlerat e tyre kombëtare – i mund të gjitha. Kosova mburret me ta dhe e pret kthimin e tyre triumfues, sepse e tillë ishte lufta për çlirim – e drejtë, e pastër dhe fitimtare”, ka thënë kreu i PDK-së Memli Krasniqi.
Vizita erdhi pasi Memli Krasniqi e nisi aktivitetin e tij si kryetari i ri i Partisë Demokratike të Kosoves prej aty ku prehen te rënët për liri të familjes së Adem Jasharit.
“Prekazi mbetet udhërrëfyesi ynë për çdo punë që bëjmë për vendin, sepse këtu ka lindur dhe ka marrë kuptim liria e popullit tonë”, shprehet ai në një postim në rrjetet sociale, në shoqërim të fotove që përcjellin nderimin e dëshmorëve të Kosovës.
Krasniqi e konsideron vizitën në kompleksin Memorial të Dëshmorëve të UÇK-së në Marinë, burim frymëzimi e fuqizimi për vetëdijen politike dhe për punët e shumta përpara./m.j
