Shqipëria prezantoi sot në Këshillin e Përhershëm të OSBE-së në Vjenë kuadrin paraprak të prioriteteve të Kryesisë së saj për vitin 2020.
Lajmin e bëri të ditur sot ministri në Detyrë për Europën dhe Punët e Jashtme, Gent Cakaj, i cili e cilësoi këtë moment me rëndësi thelbësore në përcaktimin e programit të Kryesisë Shqiptare 2020 dhe miratimin e tij nga shtetet pjesëmarrëse.
“Kuadri paraprak i prioriteteve të Kryesisë Shqiptare u vlerësua lart prej shteteve pjesëmarrëse. Thënë në mënyrë të përgjithshme, Kryesia Shqiptare 2020 do të përqendrohet në: a) dimensionin politiko-ushtarak: Parandalimi dhe zgjidhja e konflikteve në përgjithësi; vëmendje e veçantë do t’i kushtohet krizës në dhe përreth Ukrainës, trajtimi i mëtejshëm i konfliktit në Nagorno-Karabakh, adresimit të pasojave të konfliktit në Gjeorgji dhe vazhdimit të Procesit të Negociimit për Transdniestrian; Fuqizimi i rolit të gruas në proceset e paqes, në kuadër të Rezolutës 1325 të Këshillit të Sigurimit të OKB-së; adresimi i rreziqeve transnacionale, nga lufta kundër ekstremizmit të dhunshëm deri tek siguria kibernetike; lufta kundër të gjitha formave të trafikimit, veçanërisht trafikimit të qenieve njerëzore”, – nënvizoi Cakaj.
Po ashtu, vijon Cakaj, kryesia shqiptare do të përqendrohet në dimensionin ekonomiko-mjedisor: Lufta kundër korrupsionit dhe promovimi i mirëqeverisjes në shërbim të zhvillimit të përgjithshëm; ruajtja e mjedisit prej krimeve transnacionale; stimulimi i balancës midis pastërtisë mjedisore dhe politikave zhvillimore.
“Një tjetër prioritet ku do të fokusohet kryesia shqiptare është dimensioni njerëzor dhe lirive themelore: Promovimi i tolerancës dhe mosdiskriminimit në të gjithë hapësirën e OSBE-së; afirmimi i universalitetit të drejtave të njeriut dhe lirive themelore”.
Ministri Cakaj tha se “vlen të theksohet se rinia do të jetë prioriteti ndërdimensional i Kryesisë Shqiptare dhe do të ketë rol qendror në angazhimet e saj. Shqipëria do të ofrojë një kryesi aktive, efektive dhe të fuqishme në OSBE në vitin 2020”.